Қазақстан мен Өзбекстан азаматтары екі ел аумағында тіркеусіз уақытша болу мерзімін 5 күннен 30 күнге дейін ұзартты.

KAZINFORM дерегінше, 28 наурызда Қазақстан Сенаты «2000 жылғы 7 шілдедегі Қазақстан Үкіметі мен Өзбекстан Үкіметі арасындағы Азаматтардың өзара сапарларының шарттары туралы келісімге өзгерістер енгізу туралы хаттаманы ратификациялау туралы» Заңды мақұлдады.

Аталған Хаттамаға Қазақстан басшысының Ташкент қаласына сапары аясында 2022 жылғы 22 желтоқсанда қол қойылған. Өзбекстан тарапы хаттаманы былтырғы сәуір айында ратификациялаған еді.

«Заңның мақсаты - екі мемлекет арасындағы достық қарым-қатынастарды одан әрі дамыту, азаматтардың сапарларын реттеу, сондай-ақ бір мемлекет азаматтарының екінші мемлекеттің аумағында болуы үшін қолайлы жағдайлар жасауға құқықтық негізді одан әрі жетілдіру», делінген хабарламада.

Сондай-ақ, хаттамада қарастырылып отырған келесі өзгеріс – ол екінші тарап мемлекетінің аумағына келу кезінде Тараптар мемлекеттерінің (Қазақстан мен Өзбекстан) азаматтарына шекаралық қызмет беретін және кету кезінде қайтарылуға жататын көші-қон бақылау карточкаларына байланысты нормалардың алынып тасталуы.

Қазақстан Республикасы Сенатының төрағасы Мәулен Әшімбаев, Қазақстан мен Өзбекстан арасында берік бауырластық қарым-қатынас қалыптасқанын атап өткен.

«Мемлекеттер қол қойған мәңгілік достық туралы және одақтастық туралы шарттар соның айқын дәлелі. Бүгін қаралған хаттама екі ел азаматтарына өзара сапарларын жүзеге асыруда қосымша оңтайлы құқықтық жағдай орнатады. Мақұлданған заң тату көршілік қарым-қатынасты одан әрі нығайтуға өз үлесін қосады деп сенеміз», - деген Сенат төрағасы.