Shu kunlarda Qatar poytaxti Doxada qit’aning kichik raketka ustalari har ikki yilda bir marta o‘tkaziladigan Osiyo chempionati bahslarida ishtirok etmoqda.

Kecha ushbu chempionat doirasida Osiyo stol tennisi uyushmasi(ATTU) ning bosh assambleya yig‘ilishi o‘tkazildi.

Unda Xalqaro stol tennisi federatsiyasi(ITTF) vitse-prezidenti Xalil al-Moxannadi ATTU prezidenti etib saylandi, deya xabar tarqatdi Qatar axborot agentligi. Assambleya yig‘ilishi davomida, shuningdek, vitse-prezidentlar, ATTU ijroiya qo‘mitasi a’zolari ham saylandi. Yig‘ilish davomida qit’ada stol tennisini yanada ommalashtirish borasida bir qator masalalar ham atroflicha ko‘rib chiqildi.

Aytish lozimki, Qatar vakili mazkur lavozimni 2009 yildan beri egallab kelayotgan xitoylik Saya Chjenxuani o‘rniga qit’a stol tennisining yetakchisi sifatida faoliyat ko‘rsatadigan bo‘ldi.

T. Ro‘ziyev, O‘zA