Кеча “ЖЧ-2022”да 1/8 финал ўйинлари ниҳоясига етди. Португалия-Швейцария (6:1) матчини «Лусаил Айконик» стадионида кузатган салкам 89 минг томошабин еттита гол кўрди. Португалия 1966 ва 2006 йиллари ҳам 1/4 финалга етиб борган.
Криштиану Роналду кеча мундиаллардаги йигирма биринчи ўйинини ўтказди ва бу борада аргентиналик Диего Марадона, германиялик Уве Зеелер ва польшалик Владислав Жмудага етиб олди. Ўйиннинг 73-дақиқасида майдонга тушган Роналду Қатарда энг кўп ўйиндан ташқари ҳолатга тушган футболчига айланди. У 83-дақиқада айнан офсайддан дарвозага тўп йўллади. Рақиб ҳимоячилари Роналдуни жами олти марта шундай ҳолатга туширган.
21 ёшли Гонсалу Рамуш 1962 йилдан бери чемпионатларда хет-трикка эришган энг ёш ўйинчи бўлди. Венгрия футболчиси Флориан Альберт 20 ёшида Болгария билан матчда уч гол урган.
Бруну Фернандеш “ЖЧ-2022”нинг учта ўйинида икки тўп киритди ва учта аниқ узатма амалга оширди. Португалияда бундай натижани 1966 йил Эйсебио қайд этган.
Иккинчи гол муаллифи ҳимоячи Фернанду Сантуш Пепе жаҳон чемпионати плей-офф ўйинларида дарвозани ишғол этган энг ёши катта футболчига айланди. У ҳозир 39 ёшда.
Испания– Марокаш матчининг асосий ва қўшимча вақтида гол урилмади. 11 метрдан тўп тепиш баҳсида африкаликларнинг қўли баланд келди – 3:0. Шимолий Африканинг бу давлати тарихда илк бор чорак финалга йўл олди.
Марокашлик голкипер Яссин Боно “Энг яхши ўйинчи”, деб топилди. У икки марта пенальтини қайтарди. Боно мундиал тарихида пенальти сериясида гол ўтказмаган иккинчи дарвозабон. Украиналик Александр Шовковский бу борада биринчи. Украина Германияда ўтган “ЖЧ-2006”да швейцарияликларни мағлуб этиб, чорак финалга чиққан.
Испания дарвозаси қўриқчиси Унай Симон мағлубиятни шарҳларкан, шундай деди: “Жаҳон чемпионатларида сюрприз, тенг ўйин, юқори даражадаги ҳимоя бўлади. Биз бу синовлардан ўта олмадик. Марокашга ютқазамиз, деб сираям ўйламаган эдик”.
Испания бош мураббийи Луис Энрике тарафдорларидан узр сўради: “Бизни яхши қўллаб-қувватладингиз, миннатдормиз. Марокашни қутлашдан бошқа чора қолмади. Бизни кечиринглар”.
Ўйин тугаши билан африкалик футболчилар “шукур саждаси”ни қилдилар.
Бош мураббий Валид Реграги ярим ҳимоячи Ҳаким Зиёш ҳақида гапирди. “Неймар Бразилия, Мбаппе Франция учун қандай қадрли бўлса, у ҳам биз учун шунчалик қадрли. Айрим мураббийлар ҳамма ўйинчини бир хил кўриш керак, дейишади. Мен бу гапга қўшилмайман. Ҳаким оддий футбочилар сирасидан эмас”.
Қатар Амири Тамим бин Ҳамад Ал-Таний ўз ҳисобидан Марокаш – Испания матчи учун минг дона чипта сотиб олиб, марокашлик футбол фанатларига тарқатди.
Бу ўйин учун чипта нархи ўн баробар қимматлашганда Марокаш футбол федерацияси ФИФАга шикоят билан чиқди. Шундан сўнг африкаликларга беш минг чипта ажратилди.
Энди “ЖМ-2022”да қайд этилган айрим қизиқарли фактлар ҳақида.
Жамоалар таркибидаги 207 ўйинчидан 65 нафари Англия чемпионатида тўп суради. “Премьер лига”нинг “Манчестер Юнайтед” ва “Манчестер Сити” клубларидан 22 нафар, Испания “Ла Лигаси”дан 31, Италия “А серия”сидан 23 футболчи.
Қатарда жами 21 лига вакиллари бор.
Футбол бўйича жаҳон чемпионати 1930 йилдан бошлаб ўтказилмоқда. Ҳозиргача 21 мундиалнинг тўққизтасида Жанубий Америка жамоалари – Бразилия (5 карра), Аргентина ва Уругвай (2 мартадан) ғолиб чиққан. Қолган 12 турнирда европаликлар қўли баланд келган – Германия ва Италия 4 мартадан, Франция 2 бор, Англия ва Испания.
Навбат Африкага келган бўлса, ажаб эмас...
Аброр ХОН, ЎзА