“ЖЧ-2022”да 16 та матч ўтказилди, ҳеч бир ўйинда, жазолаш ўлароқ, бирор жамоа вакилининг четлатилиши кузатилмади. 1968 йил Мексикада ўтган жаҳон чемпионатида 12-ўйиндан кейингина футболчи майдондан ҳайдалган эди.
Португалиянинг Гана билан ўйинида (3:2) Криштиану Роналду 11 метрлик жарима тўпини аниқ тепиб, ҳисобни очди. Бу моҳир футболчининг ўзи қатнашган барча беш жаҳон чемпионатида дарвозани аниқ нишонга ола билганини англатди. Илгари форвард 2006, 2010, 2014 ва 2016 йиллар мундиалида муваффақиятга эришган.
Антонио Карбахаль, Рафаэль Маркес (иккаласи — Мексика), Лотар Маттеус (Германия) ва Лионель Месси (Аргентина) эса 4 тадан ЖЧ финал турнирида рақиб жамоа дарвозасини ишғол қилишган.
19 ёшли Криштиану Португалия сафидаги биринчи голини 2004 йил 14 июнь куни Европа чемпионати баҳсида, Юнонистонга қарши ўйинда ўз ҳисобига ёзган.
37 ёшли форвард ҳозирча терма жамоасининг энг ёш ва энг “кекса” тўпурари бўлиб турибди.
Португалиянинг “A Bola” сайтида Роналду жарима тўпини тепиш олдидан қўшимча қувват берувчи восита истеъмол қилгани акс этган видеолавҳани намойиш этди.
Жаҳон матбуоти Роналдуни Марадона, Пеле, Круифф, Беккенбауэр, Гарринча сингари ўз даврида порлаган юлдузлар қаторида алқай бошлади.
Португалия ярим ҳимоячиси Бруну Фернандеш Гана билан ўйинда икки бор голли узатмани амалга оширди. Бунгача португалиялик Жозе Торриш 1966 йилдаги жаҳон чемпионатида шундай натижа кўрсатганди.
Уэльс сардори ва ҳужумчиси 33 ёшли Гарет Бэйл терма жамоа сафидаги ўйинлар кўрсаткичи бўйича янги рекорд ўрнатишга тайёрланмоқда. У АҚШ билан матчда 90 дақиқа майдонда бўлиб, 82-дақиқада 11 метрли жаримадан тўп ҳам киритди. 16 ёшида илк бор асосий жамоа либосини кийган Гарет ҳозиргача жами 109 ўйин ўтказди.
Бразилия сафида икки карра жаҳон чемпиони бўлган Роналдо коронавирусга чалинди. Ҳозир у Қатардаги бир меҳмонхонада изоляцияга олинган. Афсонавий футболчи Бразилия - Сербия (2:0) матчини майдонда эмас, телевизорда кўрганидан жуда афсусда эканини қайд этди.
Бу ўйинда сариқ ранглилар ҳужумчиси Аденора Тите Ришарлисон мундиалнинг еттинчи матчидаги жуфт голи билан тўплари сонини тўққизтага етказди. Жуфт гол уришда у Неймарнинг 2014 йилдаги рекордини такрорлади.
Аброр ХОН, ЎзА