Билим ва тараққиётга интилиш жамиятни фаровонликка етказиб, тўсиқларни енгиб ўтишда кўмаклашиб, порлоқ истиқбол сари пойдевор яратади. Шу йўлда молию жонини аямаган жадидлар ҳаёти – бугун давлатимиз сиёсати даражасига кўтарилган мавзу.

Маълумки, ватанимизнинг миллий истиқлоли, халқимиз озодлиги учун курашиб, қатағон қурбонлари бўлган ота-боболаримизнинг ҳаёти ва фаолиятини атрофлича ўрганиш, тадқиқ этиш, уларнинг номлари ва хотирасини абадийлаштириш бўйича кейинги йилларда юртимизда кенг кўламли ишлар амалга оширилмоқда.    

Жумладан, 2024 йил 19 июлда Ўзбекистон Республикаси Президентининг «Сиёсий қатағон қурбони бўлган юртдошларимиз ҳаёти ва фаолиятини ўрганиш, тарғиб этиш ҳамда уларнинг хотирасини абадийлаштириш борасидаги ишларни кенгайтириш тўғрисида»ги қарори қабул қилинди.    

Қарорга мувофиқ, қатағон қурбонлари, жумладан, жадидлик ҳаракати намояндаларининг ибратли ҳаёти ва фаолиятини халқимиз, шунингдек, хорижлик сайёҳлар ўртасида янада кенг тарғиб этиш мақсадида Қатағон қурбонлари хотираси давлат музейига инфо-тур ташкил этилди.    

Тадбирда ватан ва унинг шаънини асраш учун курашиб, қурбон бўлган юртдошларимиз, жумладан, жадидлик ҳаракати намояндаларининг ҳаёти ва фаолияти, илмий-ижодий мероси, ўша даврдаги сиёсий-ижтимоий жараёнлар ҳамда ноёб тарихий ашёлар, фотосуратлар, хариталар ҳақида мутахассис томонидан маълумотлар берилди.    

Туризм қўмитаси томонидан келгусида саёҳлар оқимини янада ошириш мақсадида Қатағон қурбонлари хотираси давлат музейи ҳамда қатағон қурбонларининг номлари билан боғлиқ бошқа музей-объектлар ҳақида видеоролик ва буклет лойиҳалари тайёрланяпти. Ушбу ишларни ташкил этишдан кўзланган мақсад, келгусида қатағон қурбонлари ва жадидлик ҳаракати билан боғлиқ объектларни сайёҳлик йўналишларига киритиш ва шу ўринда маҳаллий ва хорижий туристлар оқимини оширишдир.   

Б.Худойбердиев, ЎзА