2021 жыл 2 маусым күні Қазақстан Президенті Қасым-Жомарт Тоқаев Ақорда да Өзбекстанның Премьер-Министрі Абдулла Ариповты қабылдап, ІІ дәрежелі Достық орденімен марапаттады.

Аkorda.kz сайтының хабарлауынша, Қасым-Жомарт Тоқаев заманауи сын-қатерлер кезінде тұрақтылықтың жоғары деңгейін көрсеткен екіжақты ынтымақтастықтың қазіргі ахуалына оң бағасын берген. Президенттің пікірінше, бұған жоғары деңгейдегі белсенді диалог, үкіметтер арасындағы тығыз ықпалдастық, сондай-ақ, тараптардың екі ел ортасындағы көпқырлы байланыстарды нығайтуға ұмтылысы дәлел бола алады.

– Екі мемлекет арасындағы ынтымақтастық менің Өзбекстанға жасаған сапарым кезінде құрметті әріптесім Шавкат Миромонұлы Мирзиёевпен келіссөздер барысында қол жеткізілген уағдаластықтарға сәйкес жоғары деңгейде әрі табысты дамып келеді. Біз бауырлас Өзбекстанмен ықпалдастықты дамытуға баса мән береміз. Өйткені мұны Орталық Азиядағы тұрақтылық пен қауіпсіздікті сақтаудың маңызды фактор деп санаймыз. Екі ел арасындағы ынтымақтастықты әртүрлі бағытта, ең бастысы, мазмұндық тұрғыдан ілгерілететін бірлескен бірқатар жобалардың бар екенін атап өткім келеді, – деді Қазақстан Президенті.

Президенттің сөзінше, қазақстандықтар стратегиялық әріптес әрі одақтас Өзбекстанның жетістіктеріне шын ниетімен қуанады.

– Өзбекстан Шавкат Миромонұлы Мирзиёевтің басшылығымен әлеуметтік-экономикалық даму бойынша айтарлықтай жетістіктерге қол жеткізді. Бауырлас ел болғандықтан біз бұған қуаныштымыз. Әрине Өзбекстанның табысты дамуы өзара тиімді ынтымақтастықты өркендетуге оң ықпал етеді, – деген Қасым-Жомарт Тоқаев.

Абдулла Арипов өз кезегінде кездесуге мүмкіндік туғызғаны үшін Қасым-Жомарт Тоқаевқа алғыс айтып, Өзбекстан Президенті Шавкат Мирзияевтің жүрекжарды сәлемі мен ізгі ниетін жеткізді.

– Шавкат Миромонұлы мен Сіздің, Қасым-Жомарт Кемелұлы тұрақты әрі өзара сенімге негізделген қарым-қатынастарыңыздың арқасында көпжақты қазақ-өзбек ынтымақтастығының оң қарқыны сәтті қалыптасты. Алдағы жылдары өзара сауда-саттық көлемін 10 миллиард долларға жеткізу міндетін жүктедіңіздер. Екі ел үкіметтері осы межеге нақты қол жеткізуді көздейді, – деді Абдулла Арипов.

Қасым-Жомарт Тоқаев Шавкат Мирзияевпен телефон арқылы сөйлесу барысында Өзбекстан Президентінің өзіне ыңғайлы уақытта Қазақстанға мемлекеттік сапарын ұйымдастыру жөнінде уағдаласқанын айтты.

Кездесу соңында Қазақстан Президенті Өзбекстанның Премьер-Министрі Абдулла Ариповті  қазақ-өзбек байланыстарын дамытуға және достық арқауын нығайтуға қосқан үлесі үшін ІІ дәрежелі Достық орденімен марапаттады.