Оила жамиятнинг асосий бўғини ҳисобланади. Оилада тинчлик-хотиржамлик, тотувлик бўлса, жамият ҳам ривожланади.

Минг афсуски, сўнги вақтларда арзимаган келишмовчиликлар оқибатида оилалар парокандаликка юз тутиб, ажримлар сони ортмоқда. 

Бироқ, вояга етмаган фарзандларининг моддий таъминоти учун суд томонидан белгиланган алимент тўловларини ўз вақтида ва белгиланган тартибда амалга ошириб келаётган оталар кўпчиликни ташкил этади.

Жумладан, Бюронинг Бухоро шаҳар бўлими иш юритувида Фуқаролик ишлари бўйича Бухоро туманлараро судининг 2015 йил 19 майдаги қарздор М.Ҳабибовдан ундирувчи М.Тилавова фойдасига икки нафар вояга етмаган фарзандининг моддий таъминоти учун қарздорнинг иш ҳақи ва бошқа даромадларининг 1/3 қисми миқдорида алимент ундириш тўғрисидаги ижро ҳужжати мавжуд.

Ижро ҳаракатлари давомида қарздор қўйилган чекловни бекор қилиш учун алимент тўловини олдиндан тўламоқчилигини маълум қилган. Ижро ишида қарздор ва ундирувчининг қонунчиликда белгиланган ҳуқуқ ва мажбуриятлари ҳамда Вазирлар Маҳкамасининг 2018 йил 06 октябрдаги 808-сонли қарори билан тасдиқланган “Алиментларни олдиндан тўлаш, шунингдек, алимент тўлаш мажбуриятини таъминлаш бўйича гаров шартномаси тузиш тартиби тўғрисида”ги Низом талаблари тушунтирилди. 

Шундан сўнг, қарздор ариза билан Фуқаролик ишлари бўйича Бухоро туманлараро судига мурожаат қилиб, суд қарорига асосан алимент тўлаётганлигини, ҳозирда алиментдан қарзи йўқлигини, бироқ, четга чиқиш ҳуқуқи чекланганлигини, ундирувчининг фойдасига 5 йиллик давр учун олдиндан алимент тўловини тўламоқчи эканлигини, ижро ҳужжати бўйича ижро этиш усули ва тартибини ўзгартиришни сўраган.

Белгиланган тартибда 2022 йил августдан 2027 йил июль ойига қадар бўлган давр учун амалдаги ўртача ойлик иш ҳақи ҳисобидан 106.320.453 сўм алимент тўлови ҳисобланган.

Фуқаролик ишлари бўйича Бухоро туманлараро судининг ажримига асосан ижро ҳужжати бўйича ижро этиш усули ва тартиби ўзгартирилди. Қарздор томонидан ундирувчи фойдасига олдиндан тўланиши лозим бўлган 5 йиллик давр учун бир йўла 106.320.453 сўм алимент тўлови тўлаб берилди ва қарздорга нисбатан қўйилган чеклов бекор қилинди.  

Ижро ҳаракатлари давомида ундирилган алимент пуллари ундирувчи номига АТ “Алоқабанк” Бухоро филиали томонидан очилган банк пластик картасига кўчириб берилди.  

Зариф Комилов,
ЎзА