Умумтаълим мактабларида таълим сифати ҳамда ўқитувчиларнинг касбий маҳоратини ошириш ва методик қўллаб-қувватлаш мақсадида Қарши давлат университетига вилоятдаги 9 та умумий ўрта таълим мактаби бириктирилган.

Жорий йилнинг 18 май куни Қарши давлат университети ректори Д.Набиев Косон туманидаги 58-сонли ўрта умумтаълим мактабининг битирувчи синф ўқувчилари билан учрашди. Мулоқот жараёнида университет ректори ўқувчи-ёшларнинг орзу-истаклари ва келгусидаги мақсадлари билан қизиқди. Самимий суҳбат чоғида 50 нафар битирувчидан 21 нафари олий таълим муассасасига ўқишга кириш истаги борлигини билдирди.  

Университет раҳбари битирувчи синф ўқувчиларига олий таълим муассасасига ўқишга кириш учун зарур бўладиган умумтаълим фанларидан (математика, физика, кимё, биология, ўзбек тили, рус тили, чет тили, тарих, география) zoom платформаси орқали онлайн курслар ташкил этилишини ҳамда жисмоний маданият таълим йўналишига ўқишга кириш истагида бўлган ёшларга жисмоний тайёргарлик бўйича алоҳида мураббийлар бириктирилишини маълум қилди.

Шунингдек, тадбир жараёнида университет профессор-ўқитувчилари томонидан ҳар ҳафта тегишли ўқув фанлари бўйича очиқ дарслар ва мастер-класслар ташкил этиш, тайёрлов курсларига ёш профессор-ўқитувчилар, иқтидорли магистрант ва талабаларни жалб этиш зарурлиги таъкидланди.

Учрашув сўнгида мактаб жамоасига замонавий компьютерлар жамланмаси, турли бадиий китоблар, электрон ўқув қўлланмалар, волейбол ва футбол тўплари совға қилинди. Табиийки, бундай учрашувлар нафақат мактаб моддий-техник базасини яхшиланишига балки ҳамкорлик доирасида мактаб ўқитувчиларнинг тажриба алмашишларига замин яратади, шунингдек, битирувчи синф ўқувчиларини олий таълим муассасасига кириш истагини оширади.

Университет раҳбарининг мактабларга ташрифи давом этмоқда.

Ў.БАРОТОВ,

ЎзА мухбири