Өзбекстан Республикасының Президенті Шавкат Мирзиёевтің Әзірбайжанға сапарының екінші күні екі ел басшылары жұбайларымен бірге Физули және Шуша қалаларына барды.

Кейінгі 30 жылда Физули толығымен жойылып, «елес қалаға» айналған еді. Әскери қимылдарға дейін мұнда 18 мыңға жуық адам тұрған.

Қалпына келтіру жұмыстары 2020 жылы басталғандықтан, қалаға өмір жәймен қайта оралуда. Тұрғын үйлер салынып, әлеуметтік және көлік инфрақұрылымы салынуда.

Осы маңызды және қиын кезеңде Өзбекстан Әзірбайжанмен бірге. Өйткені, біздің халықтар арасындағы қарым-қатынастың тамыры тереңде жатыр. Бізді ортақ дін, тіл мен дәстүр, рухани құндылықтар мен мәдениет біріктіреді.

Мемлекет басшысы берік достық пен бауырластықтың көрінісі ретінде 2021 жылы 31 наурызда өткен Түркі кеңесінің бейресми саммитінде Өзбекстанның Қарабақ аймағындағы ескерткіштерді, мәдени және білім беру орталықтарын қалпына келтіруге үлес қосуға дайын екенін мәлімдеген еді.

Физули қаласында 960 орындық заманауи мектептің салынуы Мемлекет басшысы бастамасының іс жүзіндегі көрінісі болды.

Мырза Ұлықбек атындағы 1 санды мектепте 40 оқу кабинеті, 6 зертхана, 2 информатика кабинеті, 5 функционалдық кабинет, мәжіліс және спорт залдары, асхана, кітапхана бар. Футбол алаңы, демалыс және іс-шаралар өткізу орындары, жүгіру жолдары құрылған.

Жаңа мектеп халықтарымызды жақындастыруға, өсіп келе жатқан әзірбайжан ұл-қыздарын Өзбекстанның бай тарихы мен мәдениетімен, ұлы бабаларымыздың мұрасымен таныстыруға қызмет етеді.

Екі ел басшылары жұбайларымен бірге салтанатты лентаны қиып, мектепті ашты.

Президенттер оқу ғимараттары және мектеп аумағымен танысып, оқушылармен сұхбаттасып, оқуларына сәттілік тіледі.

Бұдан кейін Мемлекет басшылары Физули қаласында салынып жатқан тұрғын үй кешенін аралады.

Президенттер кешендегі пәтерлердің иелерімен кездесті. Мемлекет басшысы оларды жаңа баспаналарымен құттықтады.

Шынайы әңгіме барысында Өзбекстан мен Әзірбайжан халықтары арасындағы берік достық пен бауырластық байланыстар туралы сөз болды.

Мемлекет басшылары Физулидегі өмірдің тұрақты күйге оралып жатқанына қуаныш білдірді және Президент Ильхам Әлиевтің басшылығымен Қарабақты қалпына келтіру және дамыту, халықтың игілігі үшін қолайлы жағдай жасау мақсатында жүргізіліп жатқан құрылыс жұмыстарын жоғары бағалады. Әзірбайжан халқына бейбітшілік, тыныштық және өркендеу тілегі айтылды.

Мемлекет басшылары жаңа пәтерлерді аралады. Одан кейін басшылар биіктен тұрып қирандылардың салдары мен құрылыс жұмыстарының барысын бақылап көрді. Президентке Физулиді қалпына келтіру жоспарлары туралы айтылды.