ҲУҚУҚИЙ МУНОСАБАТ

Маълумки, никоҳ тузишни хоҳловчи шахслар бу тўғрида ариза билан мурожаат этган кундан кейин бир ой ўтгач, улардан бирининг яшаш жойидаги ФҲДЁ органи томонидан қайд этилади. Никоҳни бекор қилиш-чи? Агар суд эр ва хотиннинг бундан буён биргаликда яшашига ва оилани сақлаб қолишга имконият бермаса-чи? Ушбу саволларимизга ҳуқуқшунос Ирода Қаҳҳорова жавоб берди.  

– Оила кодексининг 38-моддасига кўра, никоҳдан ажратиш икки хил усулда амалга оширилиши мумкин. Жумладан, ФҲДЁ органида (яъни загс) ва Фуқаролик судида.  

ФҲДЁ органларида никоҳни бекор қилиш эр ва хотиннинг никоҳни бекор қилишга ўзаро розилиги, умумий вояга етмаган болаларнинг мавжуд эмаслиги ҳамда мулкий низоларнинг мавжуд эмаслиги ҳолатларида амалга оширилади.  

Бу ҳолатда никоҳни бекор қилишни рўйхатдан ўтказиш эр-хотиннинг қўшма аризасига асосан улардан бирининг яшаш жойи бўйича ФҲДЁ органи томонидан амалга оширилади.  

Аризада ажрашишга ўзаро розилик, вояга етмаган болаларнинг йўқлиги, шунингдек эр (хотин) никоҳни бекор қилиш кунида ФҲДЁ органига кела олмаса, никоҳни бекор қилишни эр (хотин) ҳозир бўлмаганда рўйхатдан ўтказишга розилиги тасдиқланади.  

Никоҳни бекор қилишни рўйхатдан ўтказиш ФҲДЁ органига ариза берилган кундан эътиборан 3 ой ўтгандан кейин эр-хотин ёки улардан бири ҳозир бўлганда амалга оширилади ва собиқ эр-хотиннинг ҳар бирига никоҳ бекор қилинганлиги тўғрисидаги гувоҳнома берилади.  

Никоҳни бекор қилиш рўйхатдан ўтказилгандан кейин никоҳ тузиш тўғрисидаги гувоҳномага у бекор қилинганлиги тўғрида қайд киритилади. Шундан кейин гувоҳнома ариза берувчиларга қайтарилади.  

Гулноза Бобоева, ЎзА