Олий Мажлиснинг Инсон ҳуқуқлари бўйича вакили (Омбудсман) нафақат ҳуқуқлари бузилаётган шахсларни ҳимоя қилиш, балки ҳаракатланиш эркинлиги чекланган жойлар, яъни қамоқхоналарда сақланаётган маҳкумларнинг шароитларини ҳам мунтазам ўрганиб, зарурий чоралар кўрмоқда.

Омбудсманнинг жойлардаги минтақавий вакиллари ҳам бу масалага жиддий эътибор қаратаётир.   

Навоий вилоятидаги минтақавий вакил ташаббуси билан вилоятдаги 4-, 5-, 11- ва 12-сонли жазони ижро этиш колонияларида сақланувчи уч мингдан ортиқ маҳкум учун чуқурлаштирилган тиббий кўрик ташкил этилди.  

Соғлиқни сақлаш бошқармаси кўмагида колонияларга терапевт, кардиолог, гинеколог, офтальмолог, невропатолог, эндокринолог, жарроҳлик йўналишлари мутахассислари жалб этилди. Шунингдек, маҳкумлар ультратовуш, рентген ҳамда ЭКГ текширувларидан ҳам ўтказилди.  

Тиббий кўрик жараёнида 385 нафар маҳкум диспансер назоратига олинган бўлса, 506 нафарининг амбулатор шароитда даволаниши белгиланди. 111 нафар маҳкумга эса 23-сонли маҳкумлар учун ихтисослашган касалхонада даволаниш учун йўлланма берилди.  

Тиббий кўрик ўтказилган кунда мазкур муассасалардаги  маҳкумларнинг яшаш, овқатланиш, ювиниш, узоқ муддатли учрашув хоналари, тиббиёт бўлими ҳамда маҳкумларнинг меҳнат шароитлари ҳам ўрганилди.  

Маҳкумлар билан якка тартибда суҳбатлар олиб борилиб,  уларнинг мурожаатлари қабул қилинди. Колонияларда ўрнатилган “Омбудсман қути”лари кўздан кечирилиб, ундаги ариза ва мурожаатлар ҳам қабул қилинди.  

Н.Абдураимова,

ЎзА