9 май – Хотира ва қадрлаш куни муносабати билан Навоий шаҳридаги Президент мактабида Иккинчи жаҳон уруши қатнашчиси, 104 ёшни қарши олган Пирназар бобо Турдиев билан учрашув бўлиб ўтди.

Пирназар бобо 1941 йилдан 1947 йилгача ҳарбий хизматда бўлган. Олти йил ичида тўрт марта яраланиб, уйига икки марта қорахат келган. Сўнгги бор Болтиқбўйида яралангандан кейин ҳарбий хизматдан бўшатилган. Хизматдан қайтиб, қирқ йил хўжаликда темирчилик қилган. Кундузи устахонада ишлаган, кечаси алламаҳалгача уй қурган. Ҳозир 104 ёшга кирган отахон бугунги дориломон кунларга шукроналик келтириб, ёшларга ўз маслаҳатларини беради. 

[gallery-17341]

– Уруш мамлакатимиздаги ҳар бир оилага ўз таъсирини кўрсатди, азият етказди, – дейди Пирназар бобо. – Қанчадан-қанча болаларни етим қилиб, халқимиз қалбида оғир жароҳат изларини қолдирди. Бугунги ёшларимиз соғ-саломат бўлсин, азоб кўрмасин. Ҳеч қачон уруш бўлмасин. Биз уруш даврида кўп азоблар едик, қийинчиликлар кўрдик. Қимматчилик, очарчиликни кўрдик. Бугун ҳамма нарса муҳайё. Дориломон кунларнинг қадрига етиш керак.

Албатта, кекса авлод вакиллари билан ўтказиладиган ҳар бир учрашув, ҳар бир байрам тадбири нафақат тарих ва хотира, балки ота-боболаримиз жасоратини тарғиб қилиш ва ёшларни ватанпарварлик руҳида тарбиялашда муҳим аҳамиятга эга.

<iframe width="650" height="420" src="https://www.youtube.com/embed/IGraQaiSm_g" title="Qahramon bobo yoshlar davrasida" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

А.Бўриев, С.Аслонов (сурат,видео), ЎзА мухбирлари