Шимолий Корея АҚШ билан мулоқот эшиги ёпилмаганига урғу бериб, Сеулга нисбатан кескин позиция янада кучайтирилишини таъкидлади. Меҳнат партиясининг бир ҳафталик қурултойи якунида Ким Чен Ин “АҚШ билан тил топишишга тўсиқ йўқ” дея баёнот берди.

Шу билан бирга дастлаб Вашингтон Пхеньянга нисбатан “душманлик сиёсатидан” воз кечиши шартлигини такрорлади. Бу ҳақда ЎзА ҳамкори “Yonhap” хабар берган.

Ким ишлатган “Давлатимизнинг Конституцияда белгиланган ҳозирги мақоми” иборасида КХДРнинг ядровий давлат сифатида тан олиниш талабига ишора бордек. Зеро, етакчи денуклеаризациядан воз кечилса, музокара учун замин яратилишини аввал ҳам таъкидлаган. Энди эса Пхеньян “тинч ҳамжиҳатлик ёки абадий қарама-қаршилик” танлови АҚШнинг қўлида эканини билдирди.

Мутахассислар бу баёнот Президент Дональд Трампнинг Хитойга бўлажак ташрифи арафасида ўзига хос огоҳлантириш сифатида янграганига эътибор қаратган. Яъни, Пхеньян ядро ва ракета дастурини такомиллаштирмоқда, Москва билан ҳам яқинлашмоқда. Шу орқали музокара даврасига кучлироқ мақом билан кириб боришни мақсад қилган.

Жанубий Кореяга нисбатан қараш эса бутунлай бошқача. Ким икки Корея муносабатини “душманона давлатлараро алоқа” дея таърифлаб, бирор мулоқот эҳтимолини инкор этди. Сеул ҳукуматининг ярашиш сиёсатини “алдов” атаб, жанубни “абадий душман” ўрнида кўришини очиқ айтди.

Таҳлилчилар фикрича, бундай ёндашув КХДРнинг АҚШ билан муносабатни мустақил олиб бориш истагини намоён қилади. Пхеньян Вашингтон билан тўғридан-тўғри гаплашишни афзал билиб, Сеулни четга суряпти. Айни қадам Корея ярим оролидаги дипломатик мувозанат янада нозиклашиши эҳтимолидан дарак.

Мусулмон Зиё, ЎзА