Euronews хабарига кўра, Германия ҳукумати Украинадаги урушни тўхтатиш бўйича Россия президенти Владимир Путин билан дипломатик алоқаларни қайта бошлашга қарши эканини билдирган. Бу таклиф аввалроқ Франция ва Италия етакчилари томонидан қўллаб-қувватланган эди.

Германия Ташқи ишлар вазирлиги вакили бу ҳолатга шундай изоҳ берган: «Биз Россия ва Украина ўртасида тўғридан-тўғри музокараларни қўллаб-қувватлаймиз, чунки Украина иштирокисиз адолатли ва барқарор тинчлик бўлиши мумкин эмас. Афсуски, ҳозирча Россия позициясида ҳеч қандай ўзгариш кўринмаяпти. Россия максимал талабларни такрорламоқда ва Украина энергетик инфратузилмаси ҳамда бошқа фуқаролик объектларига шафқатсиз ҳужумларни давом эттириб, музокараларга тайёрлигини кўрсатмаяпти».

Ўтган ҳафта Германия канцлери Фридрих Мерц Кремль билан муносабатларни қайта тиклаш истиқболига шубҳа билан қарашини айтди. У Россиянинг Украинага шартсиз ўт очишни тўхтатишдан доимий равишда бош тортаётганини таъкидлади.  

«Биз босимва санкцияларни сақлаб қолишимиз, имкони бўлса уларни кучайтиришимиз керак», -деди Мерц. Унинг айтишича, Европа Иттифоқи бу масалада Киев ва Вашингтон билан алоқада бўлиб, ўзининг позициясини етказмоқда.

Бу баёнотлар Германияни Европа Иттифоқининг энг йирик аъзоси сифатида Франция билан очиқ қарама-қаршиликка олиб келди. Ўтган ой Франция президенти Эммануэль Макрон 2022 йил февралдан бери деярли тўхтаб қолган Путин билан мулоқотни имкон қадар тезроқ бошлаш кераклигини айтган эди.  

Италия бош вазири Жоржа Мелони ҳам Макроннинг позициясини қўллаб-қувватлади. Бироқ Еврокомиссия аъзоси, ташқи сиёсат бўйича олий вакил Кая Каллас бу ғояга қарши чиқиб, биринчи қадам сифатида Россияни жиддий бўлишга ва ён беришга чақирди.  

Эстония Ташқи ишлар вазирлиги Euronews’га шундай деди: «Россия Украинага қарши мақсадларини ўзгартирмагунча, у билан музокара олиб бориб бўлмайди».

Чехия Ташқи ишлар вазирлигининг позицияси қуйидагича: «Европа Иттифоқи Россия – Украина тинчлик музокаралари учун махсус вакил тайинлаш масаласини кўриб чиқиши керак. Ҳозир музокаралар АҚШ, Россия ва Украина ўртасида олиб борилаётган бўлса-да, Европанинг ролини ўйлаб кўриш, уни муҳим иштирокчи сифатида сақлаб қолиш мақсадга мувофиқ».

Сиёсий баҳслар давом этаётган бир пайтда, Брюссель Россияга қарши янги иқтисодий санкциялар пакетини тайёрламоқда.                                

<iframe width="650" height="420" src="https://www.youtube.com/embed/z0nKw7Gy9Hg" title="Putinning talablari Germaniyani Rossiya bilan muzokaralardan tiymoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА