Россия Президенти Владимир Путин “Буревестник” ядровий ракетаси синовдан муваффақиятли ўтгани ҳақида баёнот берган эди.

“The Wall Street Journal” эса мақталган ушбу қурилма ўтган аср 50-йиллари технологияси асосида яратилгани ва жиддий ҳарбий ютуқни англатмаслиги ҳақида ёзди.

Нашр нимага асосланиб бундай хулоса чиқарган?

Ҳарбий экспертлар фикрича, АҚШ шунга ўхшаш лойиҳалардан 70 йил олдин воз кечган. Сабаби кейинроқ пайдо бўлган қитъалараро ракеталар ҳар томонлама ишончли экан.

Таҳлилчилар шуни ҳам қўшимча қилишганки, “Буревестник”нинг учиш тезлиги таърифланаётганидек юқори эмас, қолаверса замонавий ҳаво мудофааси тизими томонидан осон уриб туширилиши мумкин.

Қолаверса, Путин ядровий ракетани Трампга босим ўтказиш воситаси сифатида тақдим этгани ҳам таъкидланмоқда. Сабаби, бу синов Россия ва АҚШ ўртасидаги кескинлик кучайиб бораётган бир пайтда ўтказилди.

Сўнгги пайт Америка етакчиси Украинадаги нотинчлик жараёни чўзилиб кетаётгани учун Путиндан норозилигини тез-тез ошкор қиляпти. Уларнинг ўзаро учрашуви ҳам борган сари шубҳа остида қолмоқда. Устига-устак Вашингтон Россия ҳудудига зарба бериш имконини берувчи узоқ масофали ракеталарни қўллаш бўйича Украинага нисбатан белгиланган айрим чекловларни ҳам бекор қилди.

Қуролсизланиш муаммосини ўрганиш бўйича БМТ институти катта илмий ходими Павел Подвиг эса “Буревестник”ни “биринчи навбатда сиёсий қурол”, деб атади.

<iframe width="650" height="420" src="https://www.youtube.com/embed/HaH5ravCwe0" title="Putinning gaplari yolg‘onmidi?.." frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев, ЎзА