АҚШва Россия Украина билан урушни тўхтатиш бўйича Трампнинг тинчлик режасини муҳокама қилди. РФ Президенти Владимир Путин ва махсус вакил Стив Уиткоффнинг учрашуви тахминан беш соат давом этган. Кремль ҳозирча муросага келинмагани ҳақида хабар берди.

Россия томонидан музокарада Президент Владимир Путин, унинг ёрдамчиси Юрий Ушаков ва махсус вакил Кирилл Дмитриев иштирок этган. Америка делегациясини эса Уиткофф ва Дональд Трампнинг куёви Жаред Кушнер бошқарган.  

Мулоқотдан сўнг Ушаков журналистларга урушни тўхтатиш бўйича бир неча вариант кўриб чиқилганини айтган. Яъни, Москва таклиф қилинган дастлабки режадан ташқари яна тўртта ҳужжат олган. Путин лойиҳанинг айрим бандларига нисбатан “танқидий, ҳатто салбий” муносабат билдирган. Булар Европа давлатлари томонидан киритилган таклифлар бўлиши мумкинлиги тахмин қилинмоқда.

– Ҳозирча якуний келишувга эришилмаган бўлса-да, айрим таклифлар маълум даражада қабул қилинадиган ҳолатда,– деган Ушаков. – Фақат ҳали муҳокама қилиниши керак. Бизга мос келмайдиган жиҳатларҳам бор. Демак, иш давом этади.

Таъкидланишича, суҳбат ёпиқ, таъбир жоиз бўлса, махфий тарзда ўтган ва томонлар музокара мазмунини жамоатчиликка ошкор қилмасликка келишган. АҚШ делегацияси кўтарилган масалалар юзасидан шахсан Трампга ҳисобот беради. Шундан сўнг, эҳтимол, Москва билан телефон орқали мулоқот қилинади.

<iframe width="650" height="420" src="https://www.youtube.com/embed/nA2RvEzrAB4" title="Putin va Uitkoff Ukraina bo`yicha murosaga kela olmadi " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА