Россия президенти яна бир бор Украинага Донбас бўйича кескин огоҳлантириш берди. Владимир Путин Киев ўз қўшинларини ушбу ҳудуддан тезда олиб чиқиб кетиши зарурлиги, акс ҳолда Москва бу масалада ҳарбий ҳаракатларни кучайтиришини маълум қилди.

Ҳозирда РФ Донбаснинг 85 фоизини назорат қилади. Украина эса ҳудуддан батамом воз кечишни қатъиян рад этмоқда. Путиннинг баёнотлари янги тинчлик режаси бўйича олиб борилаётган музокаралар фонида янгради.

Маълумки, яқинда АҚШ элчиси Стив Уиткофф бошчилигидаги делегация Москвада таклифнинг янгиланган вариантини муҳокама қилди, аммо томонлар муросага келмади. 

Таъкидланишича, рус расмийлари ҳудудларнинг мақоми ва Украина учун хавфсизлик кафолатлари каби ҳужжатнинг айрим бандларини маъқулламаган.

Кремлнинг фикрича, фронтдаги сўнгги ҳарбий муваффақиятлар Россиянинг музокаралардаги позициясини кучайтирган. Украина эса РФни вақт чўзаётганликда айблаб, “ҳудудни қўлга киритиш учун ҳарбий босимни давом эттирмоқда”, дея таъкидлайди.

Мусулмон Зиё, ЎзА