Россия Мудофаа вазирлигининг кенгайтирилган ҳайъат йиғилишида Владимир Путин чиқиш қилди. У Россияни парчалаб фойда кўришга уринганликда Ғарбни айблади. Бу ҳақда Евроньюс хабар тарқатди.

Шунингдек, Bloomberg агентлиги ўз манбаларига таяниб, АҚШ маъмурияти Россияга қарши янги санкциялар тайёрлаётгани ҳақида хабар берди. Агар Москва Украина билан тинчлик келишувини яна рад этса, бу санкциялар яқин вақт ичида жорий қилиниши мумкин. Манбаларга кўра, қарши чоралар Россиянинг энг муҳим соҳаларини қамраб олади.  Кремль расмийлари Вашингтоннинг бундай режасидан хабардор эканликларини маълум қилишди. 

Владимир Путин ўз чиқишида Россия ҳар доим “қарама-қаршиликлар ва можароларга дипломатик ечим топишга интилганини” билдирар экан, жумладан, АҚШ маъмурияти билан мулоқотда “маълум ижобий силжишлар” кузатилаётганини қайд этди. Шу билан бирга Россия етакчиси Украинадаги уруш сабаб Европа Иттифоқига аъзо давлатларнинг аксарияти билан муносабатлар яхши эмаслигини таъкидлади.  

Унинг сўзларидан келиб чиқадики, Россияни Украина билан “қуролли тўқнашувга деярли мажбурлашган”. Путин бунда Ғарбни, аниқроғи, Жо Байден маъмуриятини айблади. “Ҳамма қисқа вақт ичида Россия Федерацияси парчаланиб кетади, деб ўйлади. Бунга ишонган европалик очкўз гуруҳлар эса  мамлакатимиз парчаланишидан фойда кўриш умидида дарҳол бу жараёнга қўшилди”, - деди Россия раҳбари.  

Шунингдек, Путин 2025 йил якунларини сарҳисоб қилар экан, президент “махсус ҳарбий операция”нинг ижобий кечаётганини билдирди. Унинг сўзларига кўра, “Россия армияси бутун фронт чизиғи бўйлаб стратегик ташаббусни қўлга киритган ва уни мустаҳкам ушлаб турибди”, шунингдек, РФ назоратига Украина ҳудудидаги 300 дан ортиқ аҳоли пунктлари ўтган.  

Европа Иттифоқи етакчилари Россия НАТО билан уруш бошлаши мумкинлиги ҳақида бир неча бор баёнот беришган. Путин эса бу баёнотларни “ёлғон ва бемаънилик” деб атади.

<iframe width="640" height="420" src="https://www.youtube.com/embed/fv2QjxvpPdM" title="Putin: Ukraina urushi rejali ravishda keltirib chiqarilgan" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев (видео), ЎзА