РФ етакчиси Владимир Путин АҚШ президенти Дональд Трамп билан телефон орқали мулоқотда Эрон атрофидаги можарони тезроқ дипломатик йўл билан ҳал этиш бўйича бир қатор таклифлар билдирган.

“DW” нашри ёзишича, 9 март куни бўлиб ўтган телефон суҳбати Трамп ташаббуси билан ташкил этилган ва тахминан бир соат давом этган. Кремль расмий вакили Юрий Ушаковнинг айтишича, мулоқот ишчан, очиқ ва конструктив руҳда ўтган.

Суҳбатнинг асосий мавзулари Эрон атрофидаги вазият ҳамда Украина – Россия можаросини ҳал этишга қаратилган. Путин Эрон билан боғлиқ низони тезроқ сиёсий ва дипломатик усуллар орқали бартараф этишга доир бир нечта ғоя билан бўлишган.

Шу билан бирга, Трамп Украинада тезроқ ўт очишни тўхтатиш ва узоқ муддатли келишувга эришишдан манфаатдор эканини билдирган.

Таъкидланишича, томонлар халқаро вазиятнинг бошқа жиҳатлари юзасидан ҳам фикр алмашиб, алоқаларни мунтазам давом эттиришга тайёр эканини билдирган. Оқ уй мазкур телефон мулоқоти юзасидан ҳозирча расмий изоҳ бермаган.

Д.Ҳакимов, ЎзА