Россия Федерацияси президенти Владимир Путин бўлажак президент сайловида иштирок этиши мумкинлигини маълум қилди. Давлат раҳбари бу ҳақда сешанба куни Давлат Думасидаги чиқиши давомида айтган.

Путиннинг таъкидлашича, агар Конституцион суд шу ҳақда қарор чиқарса, яъни бундай тузатиш мамлакатнинг асосий қонунига зид келмаса, у навбатдаги президентлик сайловида иштирок этиши мумкин. Шу билан бирга, нотиқ конституцияга тузатиш киритиш бўйича энг аввало, Россия фуқаролари овоз бериши лозимлигини таъкидлади.

Давлат Думаси амалдаги президент янги сайловда қатнашиши мумкинлигини тасдиқловчи тузатишни аллақачон қўллаб-қувватлаган.

Аввалроқ Путин давлат раҳбари ваколати муддати билан боғлиқ чекловни олиб ташлаш ғоясини маъқулламаслигини айтган эди.

10 март куни Давлат Думаси депутати, дунёдаги биринчи космонавт аёл Валентина Терешкова конституцияга ўзгартиш киритилгандан кейин президентлик муддатини нолдан бошлаш таклифини илгари сурганди.

Конституцияга ўзгартириш киритиш Путин томонидан 15 январда Федерал мажлисга йўлланган мурожаатномада айтиб ўтилган. Ўшанда у амалдаги қонунга биноан, бир киши қаторасига икки муддатдан кўп президентлик лавозимида ўтириши мумкин эмаслигини эслатиб, “қаторасига” деган сўзни олиб ташлашни таклиф этди.

Мамлакатнинг Асосий қонунига тузатиш киритиш бўйича қонун лойиҳаси 20 январда парламентнинг қуйи палатаси томонидан илгари сурилди. Энди ушбу ташаббус парламентнинг иккала палатаси ва ҳудудлардаги қонун чиқарувчилар томонидан мамлакат президентига тасдиқлаш учун тақдим этилади. Ҳужжатни давлат раҳбари тасдиқлагандан кейингина овоз бериш жараёни бўлиб ўтади.

Унда фуқаролар Конституцияга ўзгартиш киритиш керакми ёки йўқми, деган саволга жавоб беришлари керак бўлади. Овоз бериш 22 апрель кунига белгиланди.