Россия Президенти Владимир Путин АҚШ вакиллари билан кечган музокарадан сўнг кейинги дипломатик қадамлар бўйича келишувга эришилганини маълум қилди. Шу билан бирга Кремль узоқ муддатли тинчликка фақат ҳудудий масала ҳал этилган тақдирдагина эришиш мумкинлигини очиқ айтди. Москва баёнотига кўра, Россия, АҚШ ва Украина вакиллари Абу-Дабида хавфсизлик бўйича уч томонлама музокара ўтказади. Ушбу учрашув Путин ва Вашингтоннинг уч нафар элчиси ўртасида ярим тундан кейин бошланган ва тўрт соат давом этган суҳбатдан сўнг режалаштирилди.

Кремль маслаҳатчиси Юрий Ушаков музокарани “мазмунли, конструктив ва жуда очиқ” деб баҳоласа-да, жиддий бурилиш юз бергани тасдиқланмади. Унинг айтишича, Россия етакчиси АҚШ томонига яна бир бор шуни аниқ етказганки, ўтган йил Аляскада бўлиб ўтган Трамп – Путин учрашувида келишилган ҳудудий формула амалга оширилмас экан, узоқ муддатли тинчлик келишуви ҳақида гап бўлиши мумкин эмас. Путин РФ дипломатик ечимдан манфаатдорлигини билдирган, аммо махсус ҳарбий амалиёт мақсадига эришилмагунча, Москва ҳаракатни давом эттиришини таъкидлаган.

Бу баёнотлар Украинада вазият янада оғирлашаётган бир пайт янгради. Мамлакат уруш бошлангандан буён энг оғир қиш фаслини бошдан кечирмоқда. РФ ракета ва дрон ҳужумлари энергия инфратузилмасига жиддий зарар етказган. Натижада Киев ва бошқа йирик шаҳарларда юз минглаб одам узоқ вақт электр ва иссиқликсиз қолмоқда. Украина расмийлари бу ҳолатни Москванинг тинчликка реал қизиқиши йўқлиги далили сифатида кўрсатмоқда, Россия эса бу даъвони рад этиб, ҳарбий ҳаракат беқиёс йўқотиш эвазига олиб борилаётганини айтмоқда.

АҚШ томони урушни якунлаш бўйича саъй-ҳаракатни кучайтиряпти. Музокарада Трампнинг махсус вакили Стив Уиткофф, унинг куёви Жаред Кушнер ҳамда янги тайинланган маслаҳатчи Жош Груэнбаум иштирок этди.

Асосий келишмовчилик шундан иборатки, Россия Украинадан Донецк вилоятининг бир қисмини топшириш, шунингдек НАТО аъзолигига интилишдан воз кечишни талаб қилмоқда, келажакда Киев ҳудудида НАТО қўшини бўлишига қарши чиқмоқда. Украина эса катта қурбонлик эвазига ҳимоя қилинаётган ҳудудлардан воз кечишни қатъиян рад этмоқда.

РФ томони Абу-Дабидаги учрашувни тайёрлашда АҚШ катта иш қилганини эътироф этиб, бу музокара урушни якунлаб, кенг қамровли тинчлик битимига йўл очишига умид билдирди.

Мусулмон Зиё, ЎзА