Кремль Россия президенти Владимир Путин билан Украина президенти Владимир Зеленский ўртасида бўлиши кутилаётган учрашувга тайёргарлик бўйича ишлар олиб борилаётганини тасдиқлади, бироқ бу учрашув қачон бўлиши номаълум бўлиб турибди. Россия давлати раҳбарининг матбуот котиби Дмитрий Песков журналистлар билан учрашувда шу ҳақда маълумот берди.

«Ҳақиқатан ҳам биз томондан ушбу учрашувга тайёргарлик бўйича алоқалар олиб борилмоқда. Олиб борилаётган музокараларда Россия Федерацияси президенти маъмурияти раҳбари ўринбосари Дмитрий Козак иштирок этмоқда. Ҳақиқатан ҳам муҳокама қилинадиган мавзулар кўриб чиқилмоқда», - деди Кремль вакили.

Аммо, «жараён осон кечмаяпти», деди Песков. У президентларнинг учрашиши мумкин бўлган муддати маълумми деб берилган саволга йўқ деб жавоб берган ва кун тартибида кўрилиши мумкин бўлган масалалар ҳақида ҳам аниқ жавобни айтмаган.

Бундан аввалроқ Украина президенти унинг офиси Россия томони билан икки давлат президентлари ўртасида учрашувни ташкиллаштириш бўйича музокараларни бошлагани ҳақда маълум қилган эди.

Зеленский ушбу хабарни президентлик лавозимига ўтирганига икки йил тўлиши муносабати билан уюштирилган матбуот анжуманида айтган.