Владимир Путин 1952 йил 7 октябрда Ленинградда туғилган. Юридик факультетини тамомлаб давлат хавфсизлик қўитасига ишга кирган. 1985 йилдан то 1990 йилгача у Германиянинг Дрезден шаҳрида ташқи разведка резидентурасида ишлаган.

1999 йил августгача, яъни Россия Федерацияси бош вазири лавозимига тайинлангунича Владимир Путин Ленинград давлат университети ректорининг халқаро масалалар бўйича ёрдамчисидан Федераль хавфсизлик хизмати директорлигигача бўлган йўлни босиб ўтди. 2000 йил янги йил остонасида Россия Федерациясининг биринчи президенти Борис Ельцин истеъфо беришини эълон қилиб, навбатдаги сайловгача бўлган даврда давлат раҳбари вазифасини ўша пайтда ҳукуматни бошқариб келаётган Владимир Путин зиммасига юклади. Президент сайлови 2000 йил 26 мартга белгиланди.

Владимир Путин сайловнинг биринчи даврасидаёқ 52,94 фоиз овоз олиб ғалабага эришди.

Владимир Путиннинг Россия Федерацияси президенти лавозимига расман ўтириш маросими, яъни инаугурацияси 2000 йил 7 май куни бўлиб ўтди. 2004 йилда у қайта сайланди.

Путин 2008 йилдаги президент сайловида иштирок этмади. У Дмитрий Медведев номзодини қўллаб-қувватлади. Владимир Путин 2008 йилда мамлакатнинг бош вазири лавозимини эгаллади. Шу йили мамлакат конституциясига ўзгартиш киритилди ва тўрт йиллик президентлик муддати олти йилга ўзгартирилди. Путин 2012 йилда яна президент бўлди, 2018 йилги сайловда эса рекорд даражада кўп овоз олди.  

2020 йилда конституцияга яна бир бор ўзгартиш киритилди. Ушбу янгилик президентга 2024 йилда ҳам давлат раҳбарлигига номзодини қўйиш имконини беради.