Халқаро спорт майдонларида қўлга киритлаётган ютуқларимизнинг так замини оммавий спортга берилаётган эътиборнинг маҳсулидир.

Куни кеча Тошкентдаги “Соғбон” кураш залида 2006-2007 йилларда тўғилган ўсмир-ёшлар ўртасида ўтказилган кураш мусобақаси ҳам бўлғуси чемпионлар камолоти йўлида қўйилган муҳим қадам бўлди.  

Тошкент шаҳар кураш федерацияси ва Олмазор туман прокуратураси ҳамкорлигида ташкил этилган мазкур мусобақа пойтахтимизнинг ёш курашчилари, айниқса Соғбон кураш мажмуаси атрофидаги маҳалла ёшлари учун чинакам спорт байрами бўлди.

-  Тошкент шаҳар прокурори, пойтахт кураш федерацияси раисининг қарори билан март-май ойлари шаҳримиздаги туманларнинг деярли барчасида ана шундай мусобақалар ўтказилиши белгиланган. Бугунгача Сергели, Юнусобод, Шайхонтоҳур туманларида “Прокурор кубоги” беллашувлари ўтказилди. Ушбу мусобақалар асносида пойтахтимиздаги 5000 нафардан ошиқ ёшларни оммавий спорт мусобақаларига бевосита жалб этиш, минг-минглаб ўсмирлар қалбида миллий спортимизга қизиқишни оширишга қаратилган. Шу ўринда айтиш жоизки, Тошкентдаги 12 та умумтаълим мактабларига ишсиз юрган кураш тренерлари мураббийликка жалб қилинди. Улар кураш гиламлари билан таъминланди. Янги ташкил қилинган кураш тўгаракларида шуғулланиш истагини билдирган кам таъминланган оилаларнинг фарзандлари, эътибор талаб ёшларни машғулотларда бепул шуғулланиши назарда тутилган. Бундан ташқари,  яқин вақтда пойтахтимизда кураш билан шуғулланаётган ёшларни кураш яктаклари билан таъминлаш ишлари олиб борилмоқда. Бугунги мусобақаларнинг аҳамиятли томони шундаки, Олмазор туман прокуратурасининг саъйи-ҳаракати билан “Соғбон” кураш залининг атрофи, унинг ички ва ташқи кўриниши таъмирланди, кукаламзорлаштирилди. Натижада ёшларнинг спорт билан шуғулланишлари учун барча шарт-шароитлар мухайё этилди, -дейди Тошкент шаҳар кураш федерацияси ижрочи директори Тўлқин Рўзиев.

“Соғбон”даги кураш баҳслари ҳақида шуни айтиш лозимки, беллашувларда 130 нафарга яқин ёшлар 7 та вазн тоифасида ғолиблик учун кураш олиб боришди. Муросасиз баҳслар якунига кўра, ўғил болалар 42, 50, 55, 60, +60 кг вазнларда, қизлар эса 40 ва 48 кг.да курашишди. Ўз вазнларида Ғиёс Жуманазаров, Анвар Эшпўлатов, Акобир Зоиров, Темур Жўрахонов, Бекзод Ўктамов, Лазиз Асқаров, Жавоҳир Маликов, Дилмуҳаммад Алиахматов, Хумоюн Неъматов, Бобур Йўлдошев, Суғдиёна Баҳодирзода, Севинч Мамашариопва, Фотима Умурзоқова ва Вазира Қўлмаматова ғолиб ва совриндор бўлишди.

Мусобақа совриндорлари Тошкент шаҳар кураш федерацияси, Олмазор туман прокуратураси ва хомийлар томонидан таъсис этилган диплом, медаль ҳамда совғалар билан тақдирланди.

Мутасаддиларнинг билдиришича, “Прокурор кубоги” мусобақасининг кейинги баҳслари 16-17 апрель кунлари Бектемир туманида ўтказилади.