8 қаңтар – Өзбекстан Республикасы прокуратура органдары қызметкерлері күні. Осы атаулы күнге орай салтанатты іс-шара ұйымдастырылды.

Іс-шара барысында Президенттің баспасөз хатшысы Шерзод Асадов Мемлекет басшысы Шавкат Мирзиёевтің прокуратура органдарының қызметкерлері мен ардагерлеріне арналған мерекелік құттықтауын оқып жеткізді.

Құттықтау сөзінде соңғы жылдары прокуратура органдары қызметінде жүзеге асырылған реформалар нәтижесінде бұл жүйенің халыққа жақындай түскені, адам қадір-қасиетін, құқықтары мен бостандықтарын, заңды мүдделерін тікелей жергілікті деңгейде қамтамасыз ететін маңызды институтқа айналғаны ерекше атап өтілді.

Атап айтқанда, өткен жылы шамамен 512 мың азаматтың орынсыз бұзылған құқықтары қалпына келтіріліп, 54 мыңға жуық өтініш, соның ішінде 29 мыңға тарта кәсіпкерлікке қатысты мәселе оң шешімін тапқаны прокуратура органдары қызметінің тиімділігін айқын көрсетеді.

Махаллаларда қылмыстың алдын алуға бағытталған жүйелі профилактикалық жұмыстардың нәтижесінде ауыр санаттағы махаллалар саны шамамен 1,5 есеге қысқарды. Экономикалық қылмыстарға қарсы күрес аясында мыңдаған құқықбұзушылықтың жолы кесіліп, мемлекет пен қоғам мүддесіне келтірілген елеулі шығындар өндірілді.

Президент құттықтауында цифрландыруды дамыту, киберқылмыстарға қарсы күресті күшейту, тергеу процестеріне заманауи технологияларды енгізу, ашықтық пен айқындықты одан әрі арттыру өзекті міндет екені баса айтылды. Сонымен қатар прокуратура қызметкерлері заң үстемдігі мен әділеттің символы болып, халық сенімін ақтауы тиіс екені атап өтілді.

Іс-шара барысында Президент Жарлығымен орден және медальдарға лайық деп табылған прокуратура қызметкерлеріне аталған жоғары мемлекеттік марапаттарды Президент Әкімшілігі басшысының орынбасары Нодира Хакимова табыстады.