Пойтахтимиз туманларида жиноятчилик ва ҳуқуқбузарликларнинг олдини олиш, жамоат тартибини мустаҳкамлаш ҳамда фуқаролар хавфсизлигини таъминлаш борасида тизимли чора-тадбирлар амалга оширилмоқда.

Хусусан, Юнусобод туманида Ўзбекистон Республикаси Миллий гвардияси, Юнусобод туман ҳокимлиги, Ички ишлар вазирлиги тизими ҳамда бошқа ҳуқуқни муҳофаза қилувчи органлар ўртасида яқин ҳамкорлик йўлга қўйилиб, биргаликдаги хизматлар ташкиллаштирилмоқда.

Маҳаллалар кесимида криминоген вазиятни таҳлил қилиш, ҳуқуқбузарлик содир этишга мойил шахслар билан профилактик суҳбатлар ўтказиш, ижтимоий жиҳатдан ҳимояга муҳтож оилаларни қўллаб-қувватлаш, ёшлар ўртасида ҳуқуқий маданиятни юксалтиришга қаратилган тарғибот ишлари изчил давом эттирилмоқда.  

Ҳар бир маҳалла бўйича “хавфсиз ҳудуд” тамойили асосида манзилли профилактика режалари ишлаб чиқилиб, масъул идоралар кесимида аниқ вазифалар белгилаб берилган.

Жиноятларнинг аксарият қисми тунги вақтда содир этилаётганини инобатга олган ҳолда, тунги хизматлар кучайтирилган тартибда ташкил этилмоқда. Пиёда, мотоцикл ва отлиқ патруллик гуруҳлари сони оширилиб, аҳоли гавжум жойлар, савдо ва кўнгилочар масканлар, ички кўчалар ҳамда ёритилиши етарли бўлмаган ҳудудларда назорат кучайтирилган.  

Шунингдек, замонавий ахборот-коммуникация технологияларидан фойдаланган ҳолда видеокузатув тизимлари имкониятлари кенгайтирилмоқда.

Профилактика инспекторлари, маҳалла фаоллари ва жамоатчилик вакиллари иштирокида фуқаролар йиғинлари, сайёр қабуллар ҳамда ҳуқуқий тушунтириш ишлари мунтазам равишда ўтказилиб, аҳолининг мурожаатлари тезкорлик билан кўриб чиқилмоқда.  Бу эса жиноят ва ҳуқуқбузарликларнинг барвақт олдини олиш, низоли ҳолатларни жойида ҳал этиш ҳамда жамоат хавфсизлигини таъминлашда муҳим аҳамият касб этмоқда.

<iframe width="650" height="420" src="https://www.youtube.com/embed/jkRqLbUwh2s" title="Profilaktika va nazorat choralari kuchaytirilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нигора Раҳмонова, Улуғбек Тўхтаев (монтаж), ЎзА