FOTOREPORTAJ

Poytaxtimizdagi Raqamli texnologiyalar va sun’iy intellektni rivojlantirish ilmiy tadqiqot instituti majlislar zalida O‘zbekiston professional va havaskorlar kikboksing assotsiatsiyasining ta’sis konferensiyasi bo‘lib o‘tdi.

Yakkakurash sport turlari mutaxassislari, taniqli sportchilar, murabbiylar, ota-onalar ishtirok etgan mazkur konferensiyada O‘zbekiston professional va havaskorlar kikboksing assotsiatsiyasi nomi bilan yangi sport tashkilotini tuzish, O‘zbekiston professional va havaskorlar kikboksing assotsiatsiyasi Nizomini tasdiqlash, assotsiatsiyaning rahbar organlarini saylash va uning hududiy bo‘limlarini tashkil etish bo‘yicha bir qator masalalar ko‘rib chiqildi.

Shuningdek, ta’sis konferensiyasida “O‘zbekiston professional va havaskorlar kikboksing assotsiatsiyasi” raisi etib, bir ovozdan Farhod Yusupov hamda bosh kotib lavozimiga Kamoliddin Ismoilov saylandi.

[gallery-15786]

Mazkur assotsiatsiyaning tashkil etilishi Yangi O‘zbekiston yoshlari uchun katta imkoniyatlar eshigini ochadi, ya’ni, endi kikboksing sport turi bo‘yicha yoshlarimizda nufuzli xalqaro musobaqalarda ishtirok etish imkoniyati paydo bo‘lib, mamlakatimizda ushbu sport turlariga ixtisoslashgan zamonaviy inshootlarni barpo etishga zamin yaratiladi.

Ko‘rilgan masalalar muhokamasida so‘z olganlar, ushbu sport turini mamlakatimizning barcha hududlarida keng rivojlantirish, iqtidorli yoshlarni saralab olish, sport bilan shug‘ullanishi uchun sharoit yaratish, nufuzli xalqaro turnirlarda sportchilar ishtirokini ta’minlash zarur ekanligi alohida ta’kidladi.

Muhammad AMIN (surat), O‘zA