Бунақаси бўлмаган. Бир кунда, яъни 11 декабрь куни 4 нафар дунё бокс оламида машҳур бўлган ўзбекистонлик профессионал боксчилар – Баҳодир Жалолов, Хуршид Тожибоев, Қудратилла Абдуқаҳҳоров ва Шохжаҳон Эргашев жаҳоннинг тўрт мамлакатида халқаро спорт жамоатчилиги кўз ўнгида Ўзбекистон тимсоли сифатида рингга кўтарилади.

Айнан шу куни Токио олимпиадаси чемпиони Баҳодир Жалолов профессионал боксдаги навбатдаги жангини Бирлашган Араб Амирликларининг Дубай шаҳрида ўтказади. Мазкур жанг кечасининг ташкилотчиси “Probellum” промоутерлик компанияси Олимпиада ўйинлари чемпиони Баҳодир Жалоловни Дубай рингига жалб эта олганидан хурсандлигини яширишмади.

– Биз 11 декабрда Дубайда IBF чемпионлик камари учун Санни Эдвардс – Жейсон Мама ва WBO чемпионлиги учун Жон Риэль Касимеро – Пол Батлер ўртасидаги бокс кечасига дунё бокс юлдузлари орасида катта обрўга эга бўлган Б.Жалоловни қўшганимиздан беҳад хурсандмиз. Баҳодир нафақат Олимпиада олтин медали совриндори, балки у шу кунга қадар профессионал фаолиятида мағлубиятга учрамаган ягона боксчилардан бири. Ўзбек боксчисининг сафимизда бўлиши мусобақа нуфузини янада ошириши шубҳасиз, – дея таъкидлаган “Probellum” президенти Ричард Шефер.

Профессионал бокснинг ярим ўрта вазн тоифасида (66,6 кг) ўз дастхатига эга бўлган Қудратилло Абдуқаҳҳоров 11 декабрь куни Америка Қўшма Штатларида навбатдаги жангини ўтказади. Унга мағлубият нималигини билмай келаётган канадалик Коди Кроуле рақиблик қилиши ҳақида ахборот воситаларида хабарлар тарқалди.

Аммо, куни кеча Қудратилла билан телефон орқали боғланганимизда жанг 11 декабрь куни ташкил этилиши тасдиқланганлигини, лекин бўлғуси рақиби Коди ҳали ушбу учрашувда қатнашиш ҳақидаги расмий хужжатларга қўл қўймаганлигини айтиб ўтди. Бироқ, рақиб ким бўлишидан қатъий назар Абдуқаҳҳоров АҚШда айнан 11 декабрь куни рингга кўтарилиши расман тасдиқланган.

Таъкидлаш лозим, Қ.Абдуқаҳҳоров профессионал боксдаги фаолияти мобайнида 18 та жанг ўтказиб, барчасида ғалабага эришган. Бугунги кунда WBC, WBA ва WBO йўналишлари рейтинги бўйича чемпионликка даъвогарлар сафида эътироф этилиб келинаётган ҳамюртимиз IBF йўналиши бўйича рейтингда 1-ўринни эгаллаб турибди. Унинг бўлғуси рақиби сифатида кўрилаётган Коди Кроуле эса 19 жангда қатнашиб, мағлубият нималигини билмай келаётганлардан бири саналади.

Профессионал бокснинг биринчи енгил вазн тоифасида (58,9 кг) фаолиятини давом эттираётган Хуршидбек Тожибоев 11 декабрь куни Қозоғистоннинг Алмати шаҳрида ташкил этиладиган бокс оқшомида ўзининг навбатдаги жангини ўтказади. Мазкур кечада унга россиялик Павел Маликов рақиблик қилиши белгиланган.

Кечанинг асосий баҳсида Токио олимпиадаси бронза медали совриндори, қозоғистонлик Қамшибек Конкабаев британиялик Стивен Уордга қарши биринчи оғир вазн тоифасида (90,8 кг) WBА Gold камари учун рингга кўтарилади.

11 декабрь куни АҚШ, Бирлашган Араб Амирликлари, Қозоғистон давлатлари қатори мамлакатимиз пойтахти Тошкент ҳам жаҳон профессионал бокс оламининг эътибор марказида бўлади.

Унда супер енгил вазн тоифасида (63,5 кг) жаҳон рейтингида кучлилар сафидан ўрин олиб келаётган ҳамюртимиз Шоҳжаҳон Эргашев ўзининг навбатдаги жангини Жанубий Африкалик Принс Дломога қарши ўтказиши ҳақида хабар берган эдик.

Дунёда каронавируснинг янги штампи қайд этилганлиги, Африка мамлакатлари ушбу балои офатнинг ўчоғи бўлиб қолаётганлиги сабабли катта эҳтимол билан Принс Дломо юртимизга келмайди. Шундай бўлса-да, жанг ташкил қилинади. Бироқ, Шохжаҳонга ким рақиблик қилиши ҳозирча номаълум.

Пойтахтимиздаги “Zo’r TV” аренасида ташкил этилаётган мазкур бокс оқшомида Эргашевдан ташқари яна ўнлаб юртимиз чарм қулқоп усталари ўз баҳсларини ўтказишади. Аҳамиятлиси, бир кунда 4 нафар ўзбек боксчилари дунёнинг тўрт бурчагида профессионал бокс мусобақаларини ўтказаётганлиги қизиқарли ва эътирофга арзирли.

Яна бир ўзига хос жиҳати, юртимизнинг истеъдодли спортчилари Ўзбекистон профессионал бокси учун 11 декабрни хосиятли кун бўлиб тарихга киришини таъминлай олиши ҳаммасидан ҳам муҳим нўқта. Зотан, бу мусобақалар, бу жанглар биргина боксчиларнинг ўз шахсий “чигалёзди машқи” эмас, балки мамлакат, миллионлаб қора кўз ўзбек бокс фанатларининг ор-номус, шаъни учун кураш майдони ҳамдир.

Тўлқин Рўзиев, 
ЎзА мухбири