Өзбекстан Президенті Шавкат Мирзияев Түркіменстан Президенті Сердар Бердімұхамедовпен бірге Ашхабадтағы «Ташкент» саябағының ашылу салтанатына қатысты.

Саябақ Түркіменстан астанасының Махтумкули даңғылының халық көп шоғырланатын аймағында орналасқан. Мұнда үш гектар аумақта абаттандырылған гүлзар мен Ташкенттің көрікті жерлерінің көшірмелері салынған.

Мемлекет басшылары саябақтағы жасалған жағдайды аралап, ізгі ниетінің көрінісі ретінде бақшаға ағаш отырғызды.

Өзбек және түркімен халық әндері шырқалды. Президенттер осы жерде үйлену тойын жасап жатқан жас отбасыға бақыт тіледі.

Салтанатты шараға екі елдің ресми делегациялары, Ашхабад жұртшылығының өкілдері, жастар қатысты.

Түркіменстан Президентінің Өзбекстанға сапары кезінде Ташкентте «Ашхабад» саябағы ашылғаны белгілі. Бұл екі бақ Өзбекстан мен Түркіменстан халықтары арасындағы ерекше байланыстың көрінісіне айналды.

Сонымен қатар, осы жерде «Хоразм-Ташовуз» шекаралық сауда аймағының құрылысына арналған салтанатты шара өтті.

Шекара маңындағы сауда аймағы екі елдің шекаралас аймағында, «Шавот-Тошавуз» өткізу пункті жанында салынып жатыр. Оның жалпы аумағы 20 гектарды құрайды.

Бүгін аталмыш нысанның құрылысын жалғастыру және оның қызметін реттеу жөнінде хаттамаға қол қойылды. Ауданда сауда дүңгіршектері, қоймалар, контейнерлер және кәсіпкерлерге арналған жұмыс орындарынан тұратын заманауи инфрақұрылым салу жоспарланған. Бұл сауда аймағы өзара сауданы арттыруға және іскерлік қарым-қатынастарды жандандыруға қызмет етеді.

Хорезм және Ташавуз облыстарының ақсақалдары мен шенеуніктері бейнебайланыс арқылы баршаны осы керемет оқиғамен құттықтап, құрылысты бастауға рұқсат сұрады.

Бұл игі іске Өзбекстан мен Түркіменстан Президенттері ақ батасын берді.

Екі халықтың достығы мен гүлденуіне қызмет ететін әлі талай бірлескен жобалар жүзеге асатынына сенім білдірілді.