Ўзбекистон Экологик партиясидан Президентликка номзод Абдушукур Хамзаев Фарғона жамоат саломатлиги тиббиёт институтида фарғоналик сайловчилар билан учрашди.

Вилоятдаги ишончли вакил Равшанбек Бегматов сайловчиларга номзод Абдушукур Хамзаевнинг таржимаи ҳоли ҳақида маълумот берди. Президентликка номзод Абдушукур Хамзаев сайловчиларни сайловолди дастурининг муҳим йўналишлари билан таништирди.

Дастурда номзод экологик барқарор ривожланишига йўналтирилган “яшил сиёсат”ни ҳаётга татбиқ этиш ғоясини илгари сураётганини таъкидлади. Иқтисодиётнинг барча соҳаларини яшил иқтисодиёт тамойиллари асосида ривожлантиришга йўналтирилган сиёсат юритилади. Бу эса табиий ресурслардан оқилона фойдаланиш, уларни тежаш ва биологик ресурсларнинг қайта тикланишини таъминлайди.

Мамлакатдаги асосий ишлаб чиқарувчилар, айниқса, йирик корхоналар яшил технологияларга йўналтирилади. Ватанимиз инвестициявий жозибадорлигини ошириш мақсадида “Яшил виза”  дастурини жорий этиш орқали юртимизда табиий ресурслардан самарали фойдаланишга капитал жалб қилинади. Ўз навбатида иқтисодиёт тармоқлари ва ҳудудларда яшил иқтисодиётга ўтилганлик ҳолатига баҳо бериш вақти келди. Шу муносабат билан тармоқлар ва ҳудудларнинг яшил иқтисодиётга ўтиш индексини ишлаб чиқиш таклифи илгари сурилаётгани ҳақида тўхталиб ўтди. Давлат экологик сиёсатининг устувор йўналишларини белгилашга қаратилган “Барқарор экологик ривожланиш стратегияси” ишлаб чиқиш таклиф этилади. Экология соҳасидаги тарқоқ қонунчилик ҳужжатларини кодификация қилиш орқали табиий ресурслардан оқилона фойдаланиш тартиби ва талаблари ягона соҳавий кодекслар, хусусан, Экология кодекси, Сув кодекси, Ўрмон кодексида мустаҳкамланишини алоҳида қайд этди.

[gallery-12583]

Учрашувда номзод томонидан экологик хавфсизликни таъминлашга қаратилган давлат сиёсатини амалга ошириш йўналишида инсонлар яшаш ҳуқуқининг фундаментал асосларидан бири бу уларнинг экологик ҳуқуқларни таъминлашдан иборат экани қайд этилди. Экологик ҳуқуқлар эса мамлакатдаги экологик хавфсизликни таъминлаш орқали рўёбга чиқарилади. Шу сабабли ҳам сайловолди дастурида мамлакатда экологик хавфсизликни таъминлашга қаратилган сиёсатни амалга оширишни энг муҳим давлат сиёсати бўлиши керак, деб белгиланди.

Аҳолининг  саломатлигини асраш, фуқароларнинг узоқ умр кўришларини таъминлаш дастурда муҳим вазифа этиб белгиланган. Табиат соғлом бўлса, тоза ҳаво ва тоза экологик озиқ-овқат маҳсулотлари етиштирилади. Бу эса инсон ва жамият соғлом бўлишининг фундаментал асоси ҳисобланади. Ана шу учбурчакни мувофиқлаштириш орқали ягона саломатлик дастурини ишлаб чиқиб, ҳаётга изчил татбиқ этилиши номзод томонидан алоҳида таъкидланди.  

Учрашувда сўзга чиққанлар Ўзбекистон Республикаси Президенти сайловида Абдушукур Хамзаевнинг сайловолди дастурини қўллаб-қувватлашларини билдирди.

М.Сулаймонов, М.Қодиров (сурат), ЎзА.