Самарқандда бўлиб ўтган муҳим халқаро анжуман — Шанхай ҳамкорлик ташкилотининг навбатдаги саммити ҳамда Президентимизнинг ташкилотга аъзо давлатлар раҳбарлари кенгашининг мажлисидаги нутқи, унда илгари сурилган муҳим таклиф ва ташаббуслар бугун кенг жамоатчилик томонидан эътироф этилмоқда ҳамда катта қизиқиш билан ўрганилмоқда.

Олий Мажлис Қонунчилик палатасидаги Ўзбекистон Экологик партияси фракцияси ва "Адолат” СДП фракциясининг навбатдаги йиғилишларида ҳам дастлаб Президентимиз нутқидан келиб чиқувчи фракциялар олдида турган устувор вазифалар муҳокама қилинди. 

Йиғилишларда сўз олган депутатлар Самарқанд саммитида эришилган натижалар, имзоланган ҳужжат ва келишувлар минтақада тинчлик ва осойишталикни таъминлаш, иқтисодиёт, савдо-саноат соҳаларида ривожланишга хизмат қилишини алоҳида таъкидладилар. Қайд этилганидек, давлатимиз раҳбари Иқлим ўзгаришига муносабат бўйича қўшма баёнот қабул қилиш орқали ШҲТ ушбу хавф-хатар ва таҳдидларга қарши курашишда бирдамликни намоён этаётганини таъкидлаб, бу борада ўз таркибида сиёсатчилар, жамоат арбоблари, олимлар ва эксперт-экологлар, бизнес вакилларни бирлаштира оладиган ШҲТ Иқлим кенгашини тузишни таклиф қилди.

Шубҳасиз, бундай формат иқлимга мослашиш лойиҳаларини илгари суриш, чўлланишга ва тупроқ деградациясига қарши курашиш, сувни тежайдиган технологияларни жорий этишдаги ҳамкорлик самарадорлигини оширишга имкон беради. 

Ўзбекистон Экологик партияси фракцияси вакиллари Президентимиз илгари сурган ушбу йўналишдаги таклиф ва ташаббусларни алоҳида қўллаб-қувватлашини қайд этди.  

Ҳар иккала фракция йиғилишларида ушбу тарихий нутқдан келиб чиқадиган чора-тадбирлар режаси белгилаб олинди. Бундан ташқари, қатор қонун лойиҳалари кўриб чиқилиб, муҳокама қилинди.  

Хусусан, “Адолат” СДП фракциясининг йиғилишида кўриб чиқилган “Наркологик касалликлар профилактикаси ва уларни даволаш тўғрисида”ги Ўзбекистон Республикаси Қонунига ўзгартишлар киритиш ҳақида”ги қонун лойиҳаси билан Ички ишлар органларига ўз ташаббусига кўра наркологик касалликларга чалинган шахсларни мажбурий даволашга юбориш юзасидан ҳужжатларни тайёрлаш ва расмийлаштириш ҳуқуқини бериш назарда тутилмоқда. Мазкур лойиҳа юзасидан сўз олган депутатлар унинг аҳамияти ва зарурати борасида тўхталиб ўтдилар.  

 

Муҳтарама Комилова, 
ЎзА