9 май – Хотира ва қадрлаш куни юртимизда кенг нишонланилмоқда. Давлатимиз раҳбарининг фармонига мувофиқ, Иккинчи жаҳон уруши қатнашчилари ва ногиронлари ҳолидан хабар олиниб, уларга  бир марталик пул мукофоти топширилмоқда.

Аввал хабар берилганидек, Президентимиз Шавкат Мирзиёев Мудофаа вазирлигининг Марказий ҳарбий клиник госпиталига бориб, уруш қатнашчилари ҳолидан хабар олди.

Давлатимиз раҳбари 99 ёшдан ошган иккинчи жаҳон уруши қатнашчиси Муҳиддин ота Дусанбоев билан мулоқотда бўлиб, отахоннинг дилидаги истаклари билан қизиқди.

Шу улуғ ёшида ҳам ўз дилбандларининг ҳаёти, тақдирини ўйлаётган отахон эса бу йил касб-ҳунар коллежини тугатаётган набирасининг олий ўқув юртига киришини орзулаётганини айтиб ўтди. 

Таъкидлаб ўтиш керакки, олти фарзанднинг отаси бўлган бобонинг ҳозирги кунда 31 набираси ва юзлаб эвараю чеваралари бор. Ўзбек отаси неча ёшга киришидан қатъи назар, ўз авлодлари қувончу ташвишига шерик бўлиши эса табиий ҳол.

Бобонинг бугун тилга олган орзуси эса амалга ошди. Отахоннинг энг кенжа ўғлининг қизи Имона Тўлқин қизи Тошкент давлат иқтисодиёт университетининг “Банк иши” йўналишига давлат гранти асосида ўқишга қабул қилинди.

[gallery-17344]

Шу муносабат билан мазкур ҳарбий госпиталда тантанали тадбир бўлиб ўтди. Тадбирга Тошкент вилояти ҳокими Зойир Мирзаев, Ўзбекистон Республикаси Олий таълим, фан ва инновациялар вазири Конгратбай Шарипов, Тошкент давлат иқтисодиёт университети ректори Тўлқин Тешабоев ҳамда оммавий ахборот воситалари вакиллари иштирок этди.

Тадбир давомида меҳмонлар Муҳиддин отани Хотира ва қадрлаш куни билан қутлади. Имона Муҳиддинованинг Тошкент давлат иқтисодиёт университетига ўқишга қабул қилинганини тасдиқловчи сертификат тантанали равишда топширилди.

Муҳиддин ота бундан беҳад мамнун бўлганини, Президентимизга миннатдорчилик билдиришини, юртимизда тинчлик бўлишини айтиб дуолар қилди.

Отахон билан суҳбатлашганимизда, у бугунги кун ҳаётида жуда катта воқеа бўлганини фахр билан сўзлаб берди.

– Биласизми, мендай оддий бир деҳқоннинг боласи билан бугун Президентимиз суҳбат қурди, – деди Муҳиддин ота. – Бундан бошим кўкка етди.  Эътибор ва ғамхўрликдан беҳад суюндим.

Суҳбат асносида отахон Иккинчи жаҳон уруши йиллари жанг қилиб, Украина, Беларусь, Польша, Германиягача борганини, кўплаб орден ва медаллар билан тақдирланганини билиб олдик. Ҳатто у уруш оқибатларини бартараф этишда ҳам иштирок этган. 1950 йилдагина ўз юртига қайтиб, шу ерда меҳнат қилиб, оила қуриб, умргузаронлик қилган.

Ҳозирги кунда Муҳиддин ота Тошкент вилоятининг Ўрта Чирчиқ тумани Ўртасарой қишлоғида фарзандлари, набиралари ва чеваралари қуршовида яшамоқда. Фарзандларининг айтишича, отахон келаси қишда юз ёшга тўлади.

Юзлари нурга, сўзлари эзгуликка тўла бўлган табаррук отахонни юз ёшида ҳам йўқлаш, қутлаш барчамизга насиб қилсин.

Норгул АБДУРАИМОВА, ЎзА мухбири