Давлатимиз раҳбари раислигида жорий йилнинг 11 апрель куни ёшлар сиёсати соҳасидаги ишлар натижадорлигини ошириш ҳамда улар билан ишлаш тизимини янада такомиллаштириш чора-тадбирлари юзасидан ўтказилган видеоселектор йиғилишида ҳар бир олийгоҳ ректорига 50 нафардан эътиборга муҳтож ёшлар номма-ном бириктирилган эди.

Қайд этиш жоизки, ўтган вақт мобайнида уюшмаган ёшларнинг муаммоларига ечим излаш мақсадида Наманган давлат унивeрситeти рeкторига Поп туманининг Келачи ва Ифтихор маҳалласидан ёшлар бириктирилган эди. Бу жараёнда ёшнинг ҳар бири билан индивидуал тарзда иш олиб борилаётгани, “Университет ректори ва ёшлар” учрашувларининг мунтазам ўтказиб келинаётгани, эртамиз эгаларининг жамиятда ўз ўрнини топиши, соғлом ҳаёт кечириши, ўз орзу-мақсадларига эришиши учун барча куч ва имкониятлардан фойдаланилаётгани ўзининг кутилган самарасини бермоқда.  

Мамлакатимиз мустақиллигининг 32 йиллиги муносабати билан амалга оширилган хайрли ишлар бу ёшлар қалбини чексиз қувончга тўлдирди. Хусусан, бириктирилган ёшлардан бири Мадина Ғаниева болаликдан тикувчиликка қизиқар эди. Шу пайтгача бу борада муайян тажриба ҳам тўплади. Бироқ ўзининг тикув машинаси йўқлиги сабабли мустақил иш бошлай олмаётган эди. Унга истиқлол айёми туҳфаси сифатида университет томонидан тикув машинасининг тақдим қилингани унинг ҳаётга бўлган қизиқишини ошириб юборди. У эндиликда тикувчилик орқали даромад топиши мумкин.

Поплик яна бир қиз Дилнура Шарипова ҳали мактабнинг 9-синфида ўқийди. У келажакда ҳуқуқшунос бўлмоқчи. Истагига кўра совға қилинган замонавий ноутбук энди унинг изланиши, чуқур билим олиши учун восита бўлиб хизмат қилиши, шубҳасиз.

Хушнуджон Ёқубов эса аввалги “Ректор ва ёшлар” учрашувларида орзусидаги олийгоҳга ўқишга кириши учун репетитор таълимига эҳтиёжи борлигини маълум қилган ва унинг бу талаби қаноатлантирилган эди. Хушнуджон бир неча ой давомида қўшимча билим олди, астойдил ўқиди ва натижада “Тошкент  ирригация ва қишлоқ хўжалигини механизациялаш муҳандислари институти” миллий тадқиқот университети талабасига айланди. Унга ҳам янги ноутбук совға қилинди ва бу унинг учун қўшалоқ байрам ҳадяси бўлди.

Бириктирилган ёшлардан яна бири Муҳаммадбобур Улканбоев меҳнаткаш йигит. У эндиликда машина ювиш шохобчасида мустақил иш бошлаши мумкин. Чунки илтимосига биноан унга “Карчер” машина ювиш ускунаси топширилди.

Бир сўз билан айтганда, улашилган байрам туҳфалари 10 нафарга яқин ёшлар кўнглини шодликка тўлдирди. Юракларидаги, инсон қадри улуғ Ватанда яшаш – бебаҳо бахт, деган ғурурни янада кучайтирди.

Байрам совғаларини топширган университет ректори, профессор Собитхон Турғунов ёшларни энг улуғ, энг азиз айём билан табриклаб, самимий тилакларини билдирди.

Оқилхон Дадабоев, ЎзА