Мамлакатимизда Президентимизнинг 2024 йил 27 июндаги “Паррандачилик соҳасини янада қўллаб-қувватлаш, замонавий генетик технологиялар ва кооперация тизимини жорий этиш чора-тадбирлари тўғрисида” қарори ижроси доирасида кенг кўламли ишлар амалга оширилмоқда.

Ветеринария ва чорвачиликни ривожлантириш қўмитаси, “Паррандасаноат” уюшмаси ҳамкорлигида Ҳиндистоннинг йирик генетик компанияси билан гўшт йўналишига мўлжалланган наслчилик материалларини Ўзбекистонда ишлаб чиқариш бўйича самарали имкониятларни яратиш масаласида ўтказилган музокаралар ҳам мазкур қарор ижроси доирасида ташкил этилди.

Чет эл генетик компанияси таклифига кўра Ўзбекистонда қуйидаги йўналишларни яратиш мақсадида қўшма корхона очиш режалаштирилмоқда. Биринчи босқичда, яъни 2024-2025 йилларда гўшт йўналишидаги паррандалар соф линиясини кўпайтириш корхонаси ташкил этилади. Иккинчи босқичда, яъни 2025 йилда 100 минг бош 1-тартибли репродуктор корхонаси ва инкубация цехларини қуриш белгиланган.

Ҳиндистон томони Ўзбекистондаги ҳамкор компаниялар билан биргаликда Марказий Осиё давлатларининг эҳтиёжи учун ҳар йили 
4 миллион бош 2-тартибли наслли материаллар (ота-оналик галаси) етказиб беришга ва Ўзбекистонга импорт қилинаётган наслли материаллар учун транспорт харажатларини кескин камайтиришга тайёрлигини маълум қилди.

Бундан ташқари, томонлар келгусида маҳсулотларни хорижий давлатларга экспорт қилиш учун ишлаб чиқариш қувватларини ошириш муҳимлигини билдирди.

ЎзА