Пойтахтимизда давом этаётган “Президент олимпиадаси” спорт мусобақаларининг ортда қолган 9 кунлик натижалари сарҳисобига кўра, Тошкент шаҳри жамоаси 25 та олтин, 14 та кумуш ва 8 та бронза медали билан умумжамоада етакчилик қилмоқда.

Спорт турлари кесимида эътибор қаратилса, оғир атлетика мусобақаларида Сурхондарё (4-1-1), Тошкент (3-2-5), Навоий (3-1-2) вилоятлари пешқадамликка эришган бўлса, бокс баҳсларида 9 та олтин, 10 та кумуш, 3 та бронза медали жамғарган пойтахтлик ёш боксчилар 1-ўринни эгаллади. Кейинги қаторлардан эса Тошкент (4-1-6) ва Наманган (3-4-1) вилоятлари жой олишди.

Таэквондо WT курашларида пойтахтлик ёш спортчилар 6 та олтин, 2 та кумуш, 5 та бронза медали билан карвонбошилик қилган вазиятда Жиззах, Сирдарё, Тошкент ва Фарғона вилояти вакиллари 1 тадан олтин медаль жамғарган ҳолда кейинги поғоналарни банд этди.

Эслатиб ўтамиз, 5 декабрга қадар давом этадиган мазкур комплекс спорт мусобақаларининг финал босқичидаги муросасиз баҳслар умумий ҳисобда 2 мингдан зиёд ёшларни қамраб олгани билан аҳамиятли.

Т.Рўзиев,

ЎзА