Өзбекстан Республикасының Президенті Шавкат Мирзиёев жалпыұлттық мерекеміз – Отанымыз тәуелсіздігінің 34 жылдығы қарсаңында мемлекетіміз жүргізіп келе жатқан гуманистік саясаттың айқын көрінісі ретінде «Жазасын өтеп жатқан, жасаған ісіне шын өкінген және түзелу жолына нық қадам басқан бір топ азаматтарға рақымшылық жасау туралы» Жарлыққа қол қойды.

Жарлыққа сәйкес, Өзбекстан Республикасының Конституциясының 109-бабы 23-тармағына негізделе отырып, жазасын өтеп жатқан және жасаған ісіне шын өкінген әрі түзелу жолына нық қадам басқан 523 адамға рақымшылық жасалды. 

Рақымшылық жасалғандардың 195 адам негізгі жазадан толық босатылды, 147 адам жазасын өтеуден мерзімінен бұрын шартты түрде босатылды, 87 адамның бас бостандығынан айыру жазасы жеңілірек жазаға ауыстырылды. Сондай-ақ 94 адамның бас бостандығынан айыру мерзімі қысқартылды.

Кешірілгендердің қатарында 8-і шетел азаматы, 45-і әйел, 31-і жасы 60-тан асқан ер адам, 220-і жастар (оның ішінде 1 кәмелетке толмаған). Сондай-ақ 15 адам тыйым салынған ұйымдар қызметіне қатысқандар құрайды.

Жарлықтың орындалуы аясында кешірілген азаматтарды отбасына және жақындарының қасына қайтару, қоғамға бейімделіп, пайдалы еңбекпен айналысуы, салауатты өмір салтын жолға қоюы және қоғамда лайықты орын табуына көмек көрсету бойынша тиісті министрліктер мен ведомстволарға нақты тапсырмалар берілді.