Ўзбекистон Республикаси Президенти Шавкат Мирзиёев фармойиши билан мамлакатимизда ишбилармонлик муҳитини ривожлантиришга муносиб ҳисса қўшаётган фаол ва ташаббускор тадбиркорларнинг бир гуруҳига миннатдорлик билдирди.

Миннатдорчилик мактубини олган, энг кўп иш жойларини яратган тадбиркорлар сафида Наманган шаҳридаги “Merrymed farm” масъулияти чекланган жамияти раҳбари Насимхон Азизов ҳам борлиги қувонарлидир.

Ҳам фармацевт, ҳам йўлсоз тадбиркор Насимхон Азизов бошчилигидаги "Best Stroy 2020" масъулияти чекланган жамиятининг заҳматкаш ишчи-ходимлари туну кун меҳнат қилиб, ободончилик ва маъмурчилик ишларида фаол иштирок этиб келмоқда.

[gallery-3503]

2021 йилда 300 миллиард сўмдан зиёд маблағ ҳисобига вилоят бўйича умумий узунлиги 1400 километр бўлган ички йўлларни таъмирланиши кўзда тутилган бўлиб, ҳозиргача бу ишларнинг 70 фоизи бажарилди.

Наманган шаҳрининг ўзидаги 127 та 195,8 километр ички йўллар асфальтланиши, туманларда 1204,2 километр ички йўлларни таъмирланиши режалаштирилган. Албатта бу каби хайрли ишларда Насимхон Азизов ва унинг жамоасидаги фидойи йўлсозларнинг муносиб меҳнатлари борлигини алоҳида эътироф этиш жоиз.

Йўлсоз корхона технопаркига Германия, Италия давлатларидан 5 миллион доллар эвазига келтирилган техникалар иш сифатида муҳим омил бўлиб хизмат қилмоқда. Мустақиллик байрами арафасида корхона шаҳардаги энг гавжум кўчалар – "Гўзал" ва Амир Темур проспект кўчаларини тўлиқ таъмирдан чиқарди.

Президент Шавкат Мирзиёевнинг фармойишида эътироф этилганидек, фармацевтика, қадоқлаш ва қурилиш йўналишларидаги ишлаб чиқариш лойиҳалари орқали 884 та иш ўрнини яратган фидойи тадбиркор Насимхон Азизов томонидан айни кунларда вилоят марказида йирик тиббий диагоностика маркази, меҳмонхона, арзон уй-жойлар каби кенг кўламли қурилиш лойиҳаси амалга оширилмоқда.

Оқилхон Дадабоев,

Ҳотам Мамадалиев (сурат), ЎзА