Германия Президенти Франк-Вальтер Штайнмайер 1972 йил Мюнхен Олимпиадасида исроиллик спортчилар етарли даражада ҳимоя қилинмагани учун кечирим сўради. Ҳужум оқибатида ҳалок бўлган спортчиларнинг яқинларига 28 миллион евро товон пули тўланади. Бу ҳақда “Deutsche Welle” хабар берди.

Роса эллик йил аввал 5 сентябрда “Қора сентябрь” гуруҳининг фаластинлик террорчилари Мюнхендаги олимпия шаҳарчасига бостириб кириб, Исроил жамоаси аъзоларини гаровга олади. Германия хавфсизлик кучларининг спортчиларни озод қилишга уриниши муваффақиятсиз якунланади. Махсус амалиёт натижасида исроиллик 11 спортчи ва бир немис полициячиси ҳалок бўлади.

Ўшанда Германия томонидан Исроил мутахассисларининг гаровдагиларни озод қилишга ёрдам кўрсатиш таклифи қабул қилинмаган. 50 йилдан кейин немис сиёсатчилари бу хатони тан олиш лозимлиги ҳақида гапира бошладилар.

Штайнмайер қурбон бўлган исроиллик спортчилар оиласига товон пули тўлаб бериш учун эллик йил керак бўлганини шармандалик, деб атади.

Исроил Президенти Ицхак Герцог Германиянинг бу қарорини “...муҳим, адолатли, маънавий қадам” сифатида баҳолади.

Аброр ХОН,

ЎзА