ФОТОРЕПОРТАЖ
Сурхондарё вилояти Оила ва хотин-қизлар бошқармаси томонидан Қумқўрғон туманига пресс-тур ташкил этилди. Унда вилоят ҳокими ўринбосари, Оила ва хотин-қизлар бошқармаси бошлиғи Зулхумор Хидирова, ОAВ вакиллари, босма нашрлар мухбирлари, блогерлар ва ҳамкор ташкилотларнинг матбуот котиблари иштирок этди.
Пресс-тур иштирокчиларининг илк манзили “Боймоқли барака чеварлари” тикувчилик корхонаси бўлди.
“Aёлар дафтари”га киритилган 20 нафар хотин-қиз ушбу корхонада болалар учун кийим-кечакларни буюртма асосида тикиш билан шуғулланади. Улар дастлаб шу ернинг ўзида қисқа муддатли ўқув курсларида касбга ўқитилиб, сўнг доимий иш билан таъминланган.
Кейинги манзил Боймоқли маҳалласида жойлашган 2-сектор штабида ташкил этилган Хотин-қизлар тадбиркорлик маркази бўлди.
Марказда тикувчилик, тўқувчилик, қуроқчилик, каштачилик, чопон ва кўрпа қавиш йўналишларида хотин-қизларга касб-ҳунар ўргатилади. Ҳозирда 60 нафарга яқин хотин-қиз ушбу масканда маҳорат оширмоқда.
[gallery-9466]
Пресс-тур давомида марказда фаолият олиб бораётган хотин-қизлар учун яратилган шарт-шароитлар билан яқиндан танишилди, улар билан дилдан суҳбат қурилди.
Ҳозирда марказда тадбиркорлик фаолиятини йўлга қўйган, кўрпача, чопон тикиш, каштачилик ҳамда қуроқчилик билан шуғулланаётган 10 нафар аёл “Устоз-шогирд” анъанаси асосида ёш қизларга ўз ҳунари сир-асрорларини ўргатмоқда.
Пресс-тур иштирокчилари шунингдек, Aзларсой маҳалласида яшовчи Комила опа Ойнабоева хонадонида бўлди. Комила опа жорий йилнинг апрель ойида хотин-қизлар муаммоларини ўрганиш мақсадида ташкил этилган хатлов жараёнларида “Aёллар дафтари”нинг тадбиркорлик қилиш истагида бўлган эҳтиёжманд аёллар тоифасига киритилган. У имтиёзлардан фойдаланиб, банкдан олган 20 миллион кредити ҳисобидан ўз тадбиркорлик фаолиятини йўлга қўйган. Ҳозирда калифорния ёмғири чувалчангларини боқиб биогумус етиштириш билан шуғулланмоқда.
– Даромадим ойига 10 миллионни ташкил этмоқда, - дейди Комила Ойнабоева. – Кредитимни ҳеч қандай муаммосиз тўлаб боряпман. Бундан ташқари паррандачилик қуёнчилик, чорвачиликни йўлга қўйганман. Излаган, меҳнат қилган одам ҳамиша мақсадига эришади.
Жонибек ҚЎЗИМУРОДОВ (сурат), ЎзА