23-25 июнь кунлари “Ўзэкспомарказ” павильонида «UZIME – 2025» халқаро ускуналар кўргазмаси иш бошлади. Бир майдонда дунёнинг етакчи компаниялари ишлаб чиқарувчилари ва брендлари жам бўлишди.

Унда биргина Хитойнинг барча ҳудудларидан 65та йирик компания хомашё, қуйиш ускуналари, қолип тизимлари ва автоматлаштирилган технологиялари билан қатнашди.

Албатта ҳар бир бизнеснинг тараққиёти замонавий ускуналар билан бевосита боғлиқдир. Тадбир ташкилотчиларининг таъкидлашича ушбу кўргазма минтақада халқ хўжалигининг турли тармоқлари учун зарур бўлган ускуналарни харид қилишга ёки маҳаллий корхоналаримизни йирик бизнес вакилларига таништиришга қулай платформадир.  

Унда халқаро экспертларнинг тақдимотлари, юзма-юз учрашувлар ва янги лойиҳаларнинг намойиши бўлиб ўтади. Тадбир иштирокчилари учун бу ерда фойдали шартномалар тузиш ва ўз бизнесларини янги форматда йўлга қўйишлари учун етарлича шароит яратилган.  

Намойишлардан маҳаллий ва хорижий маиший техникалар, идиш-товоқ, уй-рўзғор ва ошхона жиҳозлари, уларни ишлаб чиқарувчи технологиялар ҳамда ҳунармандчилик буюмлар ўрин олган. Шунингдек, энергетика, электроника, қурилиш, сув хўжалиги, металлургия, тоғ-кон ва ўйинчоқ саноати учун муҳим компонентлар кенг ассортиментда таклиф этилмоқда.

Яна бир эътиборимизни тортган стенд эронлик тадбиркорларники бўлди. Юртларида шундай мураккаб шароит бўлишига қарамай ўзларининг маҳсулотлари билан халқаро кўргазмада иштирок этишлари таҳсинга лойиқ.  

- Биз Эрондан келдик ва бу ерда “Дельта” компанияси номидан иштирок этмоқдамиз, — дейди кўргазма иштирокчиси эронлик Али Шафии. — Асосан саноат, қурилиш ва уй хўжалиги учун турли хилдаги елим маҳсулотларини кўргазмага тақдим этдик. Бизни компания дунё бозорларида 60 йиллик тажрибага эга. Корхонамиз Теҳронда жойлашган. Бир ярим йилдан буён Ўзбекистон бозорида фаол иштирок этиб келмоқдамиз. Маҳсулотларимиз сифати ҳам барча талабларга жавоб беради.  

Бу каби тадбирларнинг юртимизда ўтказилиши келгусида минтақада улгуржи савдо, логистика ва тўғридан-тўғри етказиб бериш занжирларини ривожлантиришга хизмат қилади.  

<iframe width="640" height="420" src="https://www.youtube.com/embed/Af8_FlTV2K4" title="Poytaxtimizda xalqaro uskunalar ko‘rgazmasi ish boshladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов,

Аброр Содиқов, Улуғбек Тўхтаев (видео), ЎзА