26-28 ноябрь кунлари “Ўзэкспомарказ” павильонларида куз фаслининг долзарб ва қишлоқ хўжалиги соҳаси учун аҳамиятли кўргазмаси ўз фаолиятини бошлади. Шунда ёпиқ павильонларда “Uzbekistan Agrotech Expo–2025” 19 халқаро кўргазмаси бўлиб ўтмоқда. Унда агросаноат комплекси учун замонавий ускуналар, қишлоқ хўжалиги техникалари намойиш этиляпти. Шунингдек, кенг кўламда боғдорчилик, иссиқхона хўжаликларига ускуналар, чорвачилик комплексларига зарур қурилмалар кўргазма иштирокчиларига тақдим этилди.

Шу ернинг ўзида яна бир қизиқарли “Uzbekistan Agromash Expo–2025” халқаро кўргазмаси очиқ павильонда ташкил этилган бўлиб, унда қишлоқ хўжалигида деҳқоннинг “қаноти” бўлмиш замонавий тракторлар, лазерли ер текислагичлари, 18 хил маҳсулотни даладан йиғиб-териб оладиган комбайнлар, қудратли тракторлар, сеялкалар ва бошқа ўнлаб деҳқонларимизга зарур бўлган замонавий техникалар намойиш этилмоқда. 

Бу ерда мева-сабзавот маҳсулотларини ҳамда гўшт ва балиқни қайта ишлаш технологияларига кенг ўрин берилган, айнан шу соҳаларга қизиқиш юқори бўлди. Шу билан бирга сут маҳсулотларини қайта ишлаш ускуналари, ветеринария, нон ва макарон маҳсулотларини ишлаб чиқариш қурилмалари, ёрлиқлар, полиграфия, қадоқлаш, тара, музлатиш технологиялари, ўсимликларни ҳимоя қилиш учун кимёвий препаратлар, пуркагичларнинг хилма-хил турлари келганларга таништирилмоқда.

Шунингдек, кўргазмадан уй шароитида меҳнатни ташкил этиш учун жиҳозлар: тикувчилик анжомлари, гилам тайёрлаш ускуналари, иссиқхона ва асаларичилик фаолияти учун қурилмалар, хом-ашёлар ўрин олди. 

<iframe width="650" height="420" src="https://www.youtube.com/embed/RXahC4zZ5Ho" title="Poytaxtimizda agrar sohaning yirik ko‘rgazmalari ish boshladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Дониёр Якубов, Улуғбек Тўхтаев ЎзА