Joriy yil 25 noyabr kuni Alisher Navoiy nomidagi kino saroyida “GDG DevFest Tashkent-2023” anjumani bo‘lib o‘tadi. Dasturiy mahsulotlar va axborot texnologiyalari texnologik parki (IT Park) ma’lumotiga ko‘ra, tadbir butun dunyo bo‘ylab “Google” dasturchilari hamjamiyati tomonidan tashkil etiladi. Uchrashuvda mutaxassislar kompaniyaning eng yangi texnologiyalari bilan tanishishi, hamkasblari bilan aloqa o‘rnatishi, bilim va tajribasini bo‘lishishi mumkin.

35 ta sessiyadan iborat dastur doirasida yirik texnologik kompaniyalarga ishga joylashish, shuningdek, generativ neyron tarmoq yordamida mahsulot prototipini yaratish, mobil qurilma uchun dastur yaratishda sun’iy ongdan foydalanish istiqboli muhokama qilinadi.

Konferensiya 3500 ishtirokchini to‘plashi, ularning 30 foizini xotin-qizlar tashkil etishi kutilyapti.

“Google” jamoasidan Mark Makdonald va Martin Gyorner, “Outtalent” vakili Tilek Mamutov, “KPMG” mutaxassisi Jitendra Gupta kabi ekspertlar spiker sifatida qatnashishi anjumanning yuqori nufuzidan dalolat.

Roman BONDARCHUK tayyorladi.

O‘zA