Сир эмаски, бугунги кунда технологиясиз ҳеч бир соҳани тасаввур қилиб бўлмайди. Шу маънода жаҳон миқёсида ривожланиб бораётган киберспорт турлари юртимизда ҳам кенг оммалашмоқда.

Қолаверса, Президентимизнинг “Киберспорт турларини янада ривожлантириш ва кенг оммалаштиришга оид қўшимча чора-тадбирлар тўғрисида”ги қарори ҳам қабул қилинган.

Тошкент шаҳар ички ишлар органларининг иқтидорли ёш ходимларини аниқлаш, улар ўртасида соғлом рақобат муҳитини шакллантиришга ҳам эътибор қаратилмоқда. Айниқса, ходимларнинг ижодий, касбий ва интеллектуал салоҳиятини рўёбга чиқаришлари учун зарур шарт-шароитлар яратилмоқда.

Ходимларнинг ўз касбининг етук мутахассиси бўлишга, шунингдек замонавий билимларни эгаллашга бўлган иштиёқини қўллаб-қувватлаш мақсадида киберспортнинг “Counter-Strike 2” тури бўйича мусобақа ўтказилди.

Беллашувларда ҳар бири 5 нафар ходимдан ташкил топган 41 та жамоа иштирок этиб, ғолиблик ҳамда республика турнирига йўлланмани қўлга киритиш учун қизғин ва муросасиз кураш олиб борди.

Якунда 1-ўрин Яшнобод тумани ИИО ФМБ жамоасига насиб этиб, республика босқичига йўлланмани қўлга киритган бўлса, 2-ўринни Тезкор вазифаларни бажарувчи сафарбарлик батальони жамоаси, 3-ўринни Миробод тумани ИИО ФМБ жамоаси эгаллади.

Ғолиблар Бош бошқарманинг тегишли диплом ҳамда пул мукофотлари билан рағбатлантирилди.

Қайд этиш жоизки, мазкур мусобақа ёшларни ўз билимларини чуқурлаштириш, замон билан ҳамнафас қадам ташлаш ҳамда ўз билим ва истеъдодларини намоён этишларига хизмат қилиши билан аҳамиятли.

Жамоа аъзоларининг баҳсларда катта ғайрат ва шижоат билан иштирок этганидан ҳам англаш мумкинки, мусобақага бўлган ёндашув жиддий ва ҳаяжонли тус олган.

Шербек Исломов, ЎзА