Португалияның солтүстігінде болып жатқан орман өрті бақылаудан шығып, төтенше жағдай жарияланды.

Associated Press хабарлауынша, өрт салдарынан қаза тапқандар саны жетіге жетті.

Елдің премьер-министрі Луиш Монтенегро өрт болып жатқан орман аймағына жақын аудандарда төтенше жағдай жариялап, өрт сөндірушілер мен мемлекеттік қызметкерлерді өртті сөндіруге жұмылдыруды бұйырды. Сондай-ақ, полиция тергеушілеріне өрттің шығуына кінәлі адамдарды табу үшін тергеуді күшейтуге шақырып, үйінен айырылған немесе эвакуацияланған азаматтарға көмек көрсетуге уәде берді.

Еуропаның Copernicus жасанды жер серігі қызметінің мәліметінше, 15 мың гектардан астам орман өртеніп, жалпы 13 шақырымдық өрт шебі анықталған. Сонымен қатар, 210 мың адам тұратын ауданға өрт қаупі туындаған.

Испания қарулы күштері өртке қарсы күресу үшін көрші елге 240 сарбаз және көлік жіберді. Франция төрт су тасушы ұшақ жіберсе, Марокко да Португалияға екі ұшақ қызметін ұсынған.