Португалия ҳукумати COVID-19 чекловларини юмшатиш учун мактаб, музей ва кафеларни қайта очишга қарор қилди.

Мамлакатда карантин босқичма-босқич бекор қилиниши режалаштирилган.

Расмийлар томонидан жорий этилган кучли назорат Португалияда кўпгина эшикларни ёпиб қўйган эди. Ўшандан бери биринчи марта 15 ёшгача бўлган 500 минг ўқувчи дарсга қайтди.  

Таъкидлаш керак, ҳукумат чекловларга 15 мартдан енгиллик кирита бошлаган. Яъни, китоб дўконлари, мактабгача таълим муассасалари ва сартарошхоналар фаолиятига рухсат берилган эди.

Парламент эса фавқулодда ҳолатни апрель ойи ўрталарига қадар узайтиришни маъқуллаяпти. Агар вазият яхшиланса, ресторан ва бозорлар олдинроқ очилиши мумкин.

Музей, миллий ёдгорлик дўконлари ва спорт заллари қатъий санитария қоидаларига риоя қилинган ҳолда очилади.

Маълум бўлишича, хорижий сайёҳларнинг мамлакатга кириши ҳануз тақиқ остида. Португалия ва Испания ўртасидаги қуруқлик чегара назорати апрель ўрталаригача узайтирилди.  

Шу ойнинг 19 санасигача мамлакатда коронавирус билан боғлиқ ҳолат кескин ортиб кетмаса, ўрта мактаблар ва университетлар ҳам очилади.

Дарвоқе, Португалияда COVID-19 инфекцияси юқтириб олганлар 823 минг 355 кишини ташкил қилади. 16 минг 879 нафар бемор эса вирус қурбонига айланган.