Tadbirkorga 5 ming dollar evaziga ko‘p qavatli uy qurilishini olib berishni va’da qilgan firibgarlar ishi fosh etildi, deya ma’lum qilmoqda Bosh prokuratura huzuridagi Departament matbuot xizmati.
Xabarda qayd etilishicha, Departament hamda DXXning Sirdaryo viloyati boshqarmalari tomonidan tadbirkorlik sub’ektlarining huquqlarini himoya qilish yuzasidan o‘tkazilgan tezkor tadbirda muqaddam firibgarlik jinoyati uchun sudlangan fuqaro R.R. “A.R.” MCHJ rahbarining ishonchiga kirib, unga Jizzax viloyati Zafarobod tumanida ko‘p qavatli uylar qurilishi rejalashtirilganligini, shundan 5 qavatli 1 ta uy qurish uchun shartnoma tuzishda tanishlari orqali yordam berishini va’da qilib, evaziga undan firibgarlik yo‘li bilan 5 ming dollarni olgan vaqtida ushlangan. Uning ko‘rsatuviga asosan davom etgan tadbirda fuqaro A.U. sherigi R.R.dan 5 ming dollarni olgan vaqtida ashyoviy dalillar bilan ushlangan.
Mazkur holat yuzasidan jinoyat ishi qo‘zg‘atilib, tergov harakatlari o‘tkazilmoqda.
Shahnoza Mamaturopova, O‘zA