Водий вилоятларини Тошкент билан боғловчи йўллардан бири ҳисобланган “Фарғона ҳалқа йўли” автомобиль йўлининг Поп-Наманган йўналишидаги 75 километр қисми айни вақтда реконструкция қилинмоқда.

Кенг кўламдаги ушбу бунёдкорлик ишлари хорижий инвесторлар билан ҳамкорликда амалга оширилмоқда. Мазкур лойиҳа Хитой Халқ Республикасининг “Citic Construction” компанияси томонидан “молиялаштириш+лойиҳалаш+қуриш” тамойили асосида тўрт тасмали цементбетон билан қопланади.

Наманган вилояти ҳокими Шавкат Абдураззоқов ҳамда Хитойнинг “Citic Construction Co., Ltd.” Компаниясининг Европа ва МДҲ давлатлари департаменти катта директори Ван Чанхуа бошчилигидаги делегация вакиллари ўртасидаги учрашувда лойиҳани тезлатиш юзасидан фикр-мулоҳазалар алмашилди. 

[gallery-26972]

Ўзаро мулоқотда вилоят раҳбари чет эл сармоядорларининг муаммоларини тинглаб, уларни зудлик билан ҳал этиш юзасидан мутасаддиларга тегишли топшириқлар берди. Учрашувда лойиҳани сифатли ҳаётга татбиқ этиш бўйича масалалар атрофлича кўриб чиқилиб, жараённи тезлатишга келишиб олинди.     

Мазкур йирик қурилиш объектидан кутилаётган самарадорлик анча юқори. Бошқача айтганда, юк кўтариш қуввати 13 тонна бўлган умумий фойдаланишдаги йўллар узунлиги улушини кўпайтириш, юк ва йўловчилар оқимининг асосий йўналишлари бўйича қувватлар захираларини тўрт баробарга ошириш, бахтсиз ҳодисаларни камайтириш, туманлар аҳолиси ва тадбиркорлари томонидан Тошкентга бориб-келиш ҳамда туризмни ривожлантиришга янада қулайлик яратади.

Оқилхон Дадабоев, Ҳотам Мамадалиев (сурат), ЎзА.