28 тамыз күні Польшада әуе шоуына дайындық барысында F-16 жойғыш ұшағы апатқа ұшырады.

Polskie Radio хабарлауынша, оқиға салдарынан ұшқыш қаза тапты. 

Үкіметтің баспасөз хатшысы Адам Шлапка мәлімдегендей, ұшақ Орталық Польшадағы Радом қаласында құлаған.

Жойғыш ұшақ Радом халықаралық авиасалоны аясында өткізілуі жоспарланған әуе шоуының жаттығулары кезінде апатқа ұшыраған. Шара осы аптаның соңына 30–31 тамызға белгіленген еді, алайда оның өтетіні не өтпейтіні әзірге белгісіз.

Әлеуметтік желілерде куәгерлер түсірген видеолар жарияланды. Кадрларда ұшақтың күрделі маневрлер жасап, кейін жерге соғылып, жарылғаны көрінеді. Әуе апатының нақты себептері әзірге анықталған жоқ.