Польша үш жыл ішінде қорғаныс бюджетін екі есе көбейтті, деді елдің Премьер-министрінің орынбасары, ұлттық қорғаныс министрі Владислав Косиняк-Камыш журналистерге.

— Биылғы әскери шығын 2022 жылмен салыстырғанда екі есе, 2023 жылмен салыстырғанда 60 пайызға артты, — деді ол. — Алайда сатып алынған қарудың бәрі бірден армияға берілмейді. Уақыт – біз үшін басты қауіп. Сатып алынған қарудың жеткізілуін күтуге мәжбүрміз.

Соңғы жылдары Польша әскери келісімшарттар санын күрт арттырды. Жергілікті өндірушілерден бөлек, АҚШ, Оңтүстік Корея сияқты бірқатар елдерден ұрыс ұшақтары мен тікұшақтар, зеңбірекке арналған оқ-дәрілер, зымырандар, танктер және басқа да броньды техника, әуе шабуылына қарсы қорғаныс жүйелері сатып алынуда.

Айтылғандай, биылғы ел бюджеті жоспары бойынша әскери шығын жалпы ішкі өнімнің 4,7 пайызын құраған.