Mamlakatimizda mehmon bo‘lib turgan Pokiston Islom Respublikasi Bosh vazirining maslahatchisi Abdul Razzoq Dovud boshchiligidagi delegatsiya bugun Samarqandga keldi.

Samarqand viloyati hokimligida O‘zbekiston Respublikasi Bosh vaziri o‘rinbosari A.Abduhakimov va viloyat rahbarlarining Pokiston delegatsiyasi bilan uchrashuvi o‘tkazildi.

Suhbat chog‘ida mehmonlarga viloyatning investitsion jozibadorligi, turizm salohiyati, meditsina va farmatsevtika yo‘nalishidagi imkoniyatlari haqida ma’lumot berildi. Yuk tashish va aviaqatnovlarni rivojlantirish, ikki mamlakat ishbilarmonlari o‘rtasidagi manfaatli hamkorlikni kuchaytirish, oliy ta’lim muassasalari o‘rtasida o‘zaro tajriba almashinuvlarni yo‘lga qo‘yish yuzasidan fikrlashib olindi.

Xususan, oliy ta’lim bo‘yicha hamkorlik natijasida bugungi kunda Samarqand davlat tibbiyot institutida 130 nafar pokistonlik talabalar xalqaro standartlar darajasida tahsil olayotgani, ular uchun barcha shart-sharoit yaratilgani ta’kidlandi. Yaqin orada Pokiston Islom Respublikasidan yana 120 nafar talaba va 10 nafar professor-o‘qituvchi Samarqandga kelishi ma’lum qilindi.

[gallery-1003]

Maslahatchi Abdul Razzoq Dovud kecha davlatimiz rahbari qabulida ham muhim masalalar yuzasidan fikrlashib olinganini ta’kidlab, O‘zbekiston va Pokiston aloqalari yangi bosqichda izchil davom etishiga ishonch bildirdi.

Uchrashuvdan so‘ng mehmonlar Imom Buxoriy majmuasini ziyorat qildi. Pokistonliklarga mazkur muqaddas qadamjo tarixi, majmuani yana ham obod qilish maqsadida ishlab chiqilgan loyihalar haqida ham batafsil ma’lumot berildi.

Imom Buxoriy ilmiy-tadqiqot markazi faoliyati va bu yerdagi muzey bilan tanishuv ham delegatsiya a’zolarida katta taassurot qoldirdi.

Pokiston Islom Respublikasi Bosh vazirining maslahatchisi boshchiligidagi mehmonlar Samarqandning boshqa tarixiy-madaniy yodgorliklari bilan ham yaqindan tanishdi.

G‘.HASANOV, A.ISROILOV (surat), O‘zA